Gula 153
Gidayal dayon nako ang mga numero sa telepono sa kompaniya nga gitrabahoan ni Ferdinand. Mibagting kini’g makaduha ug gitubag na sa company operator. Gisultihan ko dayon siya nga gusto kong makigsulti kang Ferdinand Sosa.
Apan nasugmoyo ko sa gisugilon sa company operator nga out-of-town kuno si Ferdinand. Tua kuno sila sa Balanga, Bataan kay nag-deliver og mga tambal sa mga pharmacy didto nga suki sa kompaniya nga iyang gialagaran. Gibutang na lang nako ang telepono human makapasalamat sa operator nga maoy nakadawat sa tawag nako.
Mibati ko’g diyotay’ng kasubo nga wala kami magkasulti si Ferdinand. Bisan dili mahimong makigkita ko niya kay basin og manawag si Davon samtang wala ko sa among gipuy-an, maayo na lang unta kadto kun magkasulti kami si Ferdinand sa telepono. Igo nang makahupay sa akong kalaay ang iyang tingog bisan sa telepono lang kini nako mabati.
Nabatyagan man god nako nga na-in love na ko pag-ayo kang Ferdinand. Kun kaniadto na-crush lang ko niya, karon naseguro na nako nga nahigugma na gyud ko niya. Husto gyud ang akong impresyon sa unang higayon nga nakita ko si Ferdinand nga dili siya lisod higugmaon. Bisan og dako-dako ang gintang sa among pangedaron apan wala ko kini igsapayan.
Pagkasunod adlaw, wala pa gihapon mahiuli si Davon. Wala na sab siya manawag sa telepono. Misantop sa akong hunahuna nga gituyo niya kini. Basin og nagplano siya nga iya kong surpresahon sa iyang pagpauli aron iyang madiskobrehan kun unsay akong gipangbuhat samtang wala siya. Ingon niini man ang sagad buhaton sa mga lalaking higpitan, ipihan ug seloso. Misamot hinuon ko’g ka-turn off kang Davon gumikan sa inanay’ng pagkausab sa iyang kinaiya.
Kun magkinaunsa ug dili na mi magkasinabot, makigbulag na lang gyud ko kang Davon. Dili ko makatugot nga hiktan niya sa liog. Total, may lain na man kong “papa”. Naa man ang akong beloved Ferdinand!
Milabay pa gyud ang laing adlaw. Wala gyud manawag si Davon nako aron unta pagpahibalo nako kun kanus-a siya mopauli. Gilaay na ko pag-ayo sa balay. Nakahunahuna kong mopalit og tabloid aron magbasa-basa sa giseryal nga mga nobela niini.
Nakabig ang akong pagtagad sa banner story sa tabloid nga akong napalit: 5 carjackers todas sa cavite shootout! Gibasa nako ang mga detalye sa balita. Ug nakugang ko sa akong nasayran! -- Sumpayan pa