Sukli sa utang

Gula 151

Human sa taudtaod namong panagsulti, nanamilit na si Rodolfo Trinidad. Dihang nakalakaw na siya, akong gibalik pagtak-op ang pultahan. Misulod ko sa akong lawak ug gi-areglar ang akong kaugalingon atubangan sa tokador. Gisudlay ug gitrapo-trapohan ko ang akong mga buhok nga wala pa mauga kay bag-o pa man kong nahuman og kaligo.

Samtang padayon kong nag-atubang sa salamin sa tokador, misantop sa akong hunahuna ang gisulti ni Rodolfo Trinidad nako dili pa lang dugay. Nagplano diay sila si Davon nga maghimog joint business venture. Unsa kahang matanga sa negosyo ang ilang sudlan?

Wala maghisgot si Davon ngari nako nga nagplano diay siyang magnegosyo. Mao ray iyang gitug-an nako nga nagplano siyang mopalit og balay sa usa ka exclusive nga subdivision sa Dasmariñas, Cavite ug ang pagpalit niya’g kaugalingong sakyanan.

Dili ko supak sa plano ni Davon nga magnegosyo. Pero nalain lang ang akong impresyon nganong wala ko niya tug-ani bahin niini. Ambot, dautan ra tingali ko’g hunahuna. Basta kay alang nako, morag wala koy labot sa iyang kinabuhi. Wala gyud diay ko niya tug-ani bahin sa tanan niyang mga plano sa kinabuhi.

Tungod niini, nakaingon ko sa akong kaugalingon nga angay lang sab nga dili ko siya tug-anan sa tanan kong mga sekreto.

Naputol ang akong pagpamalandong sa dihang nabati ko ang pagbagting sa telepono didto sa receiving area sa apartment. Midali ko paggawas sa lawak aron tubagon ang telepono. Gipunit dayon nako ang awditibo gikan sa crib niini ug gitubag ang nanawag. Si Davon diay.

“Nganong karon ka man lang nanawag?” Paraygon ang akong tingog nga nangutana niya. “Kagabii ra baya kong nagpaabot nga manawag ka. Laay kaayo diri sa balay nga ako rang usa ang natulog kagabii.”

“Nagbiyahe mi kagabii,” maoy pasabot ni Davon. “Maong wa gyud ko makahigayon pagpanawag nimo.”

“Hain na man mo ron?”

“Di a na sa Baguio.”

“Duna ra bay tawo nga miari diri sa atong gipuy-an kaganina. Nangita nimo.”

“U-unsa? K-kinsa? Kinsa ang maong tawo? Kinsa siya, Editha?”

Nahibulong ko kay ingon sa nabalisa pag-ayo si Davon pagkasayod nga may tawo nga nangita kaniya. -- Sumpayan pa