Gula 150
Sakto sa barog ang lalaki nga nahitukboy sa gipuy-an namong apartment. Wala ko makaila niya. Karon pa ko makakita niya sukad masukad. Hinuon, dili na bag-o alang nako ang iyang panagway kay may kamay-ong man siyang artista -- ang action star nga si Rudy Fernandez.
Sa gisul-ob niyang karsones nga maong nga giparesan sa jacket nga itom, morag actor ang postura sa maong lalaki. Mitutok siya nako’g makadiyot, daw nakalitan pagkakita nako nga miabli sa pultahan.
“Unsay ato?” Mao kini akong gipangutana kaniya kun sa Binisaya pa kay gitinagalog man nako ang pagsukna niini kaniya.
“Maayong buntag, Miss,” sa lalaki pa nga nagpahiyom. “Mao ba ni gipuy-an ni Davon Antigua?”
“Oo. Ngano man unta?”
“Gusto lang kong magpakisayod kun hain siya karon.”
“Wa ra ba siya dinhi karon. Tua siya sa Baguio kauban ang iyang boss. Kagahapon sa hapon ra to silang nigikan.”
“A, diay ba?”
“Mao kana. A, tabi...kinsa ka man diay”
“Ako si Rodolfo Trinidad, higala ni Davon. Ikaw?”
“Ako si Editha, asawa ni Davon.”
“Mao ba? Wa man maghisgot si Davon nako nga may asawa na diay siya. Ug guwapa pa gyud.”
Nakapahiyom ko’g hilaw sa ulahi niyang gisulti. Flattered ko niini.
“Wa ba sab makahisgot si Davon nimo bahin nako?” Gikan kang Rodolfo ang pangutana.
“Wa man sab,” laktod kong tubag.
“Tungod tingali sa iyang ka-busy maong wa na siya’y higayon sa pagpakighisgot nimo bahin sa iyang mga higala.”
“Tingali...”
Nahilom mig makadiyot.
“Aw, dayon una,” giingnan ko siya nga mibatig kaikog nga diha ra kami nagsultihanay sa gawas sa pultahan.
“Ayaw na lang,” mibalibad si Rodolfo. “Di na man sab ko magdugay.”
“Unsa man diay untay imong tuyo kang Davon?”
“Bahin sa negosyo. Nagsabot man god ming maghimo’g joint business venture. Gusto kong masayod kun mohinayon ba siya sa among sabot.” -- Sumpayan pa