Ang Tinagoan

Gula 39

(Kining maong nobela gibase sa matuod nga kaagi ni Dinah).

Wala maglihok si Padre Gio samtang nag-anam og kaduol ang ngabil ni Dinah sa ngabil niini. Gustong molingiw ang pari aron paglikay nga dili magkaakob ang ilang mga ngabil. Apan gipugngan ni Dinah ang suwang sa pari aron dili kini makalikay kaniya.

Tuod man, nagkaakob gayod ang ilang mga ngabil. Sa sinugdan, ang dila lang ni Dinah maoy nagtrabaho. Morag nag-ukon-ukon pa si Padre Gio. Apan sa kadugayan, milihok na ang dila sa pari. Hilom kining gikahinangop ni Dinah. Sa iyang hunahuna, nakaingon siya nga mi-give way na gyud si Padre Gio. Milampos gyud siya sa pag-seduce niini.

Nagtinal-opay ang ilang mga dila sa pinadulot nga hinagkanay. Halok nga tugob sa kainit. Halok nga tugob sa kahangol. Halok nga tugob sa kauhaw. Kanang halok nga daw gipulog sa tumang kahidlaw!

“Di ta dinhi,” maguwang lang sa hagawhaw ang tingog sa pari. “Mopahimutang tag maayo.”

“Ikaw ang bahala,” giingnan ni Dinah ang pari nga ingon sa nahikalimot na nga usa siya ka alagad sa Dios.

Dihadiha gibaswat si Dinah ni Padre Gio ug gidala ngadto sa sulod sa lawak niini. Gipahimutang siya sa pari sa ibabaw sa kama.

Nasuta ni Dinah nga dili siya ang unang babaye sa kinabuhi ni Padre Gio. Bisan mao pay pagsugod sa ilang pagpinarayganay apan iya nang na-diskobrehan nga hanas na kini sa paglipay og babaye. -- Sumpayan pa