Tinuod nga higala

Ayaw palabig pasayasaya atorni. Daghan na ra bang abogadong gipamatay, malumong tambag ni Asterio Miseyas drayber og habalhabal nga nag-parking sa eskina Seno Street ug Abellana Street sa Canduman, Mandaue City.

Niagi ang abogado duol sa gi-parking niyang motorsiklo. Iyang nahigala si Atty. Glen Castro nga naa mag-opisina sa Tanco Bldg. sa Upper Canduman.

Lunes ngadto sa Biyernes tig-opisina siya diha ug anha sab matulog. Sabado’g Domingo mopauli siya sa iyang balay sa lungsod sa San Demetrio. Bag-o lang nahuman og jogging karong buntaga, alas sayis ang takna, si Glen. Gikan na siya’s skywalk sa Talamban diin tua iyang finish line.

Ug naglakaw na lang siya padulong sa iyang opisina.

“Wa man tay kontra,” ni Glen nga nagpahiyom.

“Bisan na, atorni,” ni Asterio nga mabination. Gisundan niya og tan-aw ang abogado nga nitungas na sa Seno Street ngadto sa Tanco Bldg. nga usa ka gatos ka metros ang gilay-on gikan sa eskina. Nipatik ang kabalaka sa hitsura ni Asterio.

Way kontra tinuod si Glen. Kay bisan kontra sa iyang kliyente, iya man gihapong higala. Labi na ang abogado sa iyang kontra. Wa man guy personalan ang panglaban. Trabaho lang.

Mao nay kasagarang isulti niya sa iyang mga kliyente. Kay duna may kliyente nga mangigi o magselos kun maayo iyang tinagdan sa abogados pikas o mismo sa kliyente sa maong abogado.

“Kamo ra may nag-away sa kaso. Ang abogado wa man. Higala man lang gihapon,” mao ni iyang gisulti ni Ben Abella nga kliyente niya nga gustong di ipatagad ang abogados pikas ug kliyente.

Apan nalimot lang tingali si Glen nga gikasuyaan siya mismo sa iyang bayaw nga lalaki ug sa iyang asawa. Kay ang iyang bayaw nga si Brendo nihangyo sa iyang manghod nga si Gina nga dili na lang ipa-deport iyang bana nga Aleman. Nagpalaban si Gina ni Glen sa iyang kaso batok sa iyang bana. Hilom nga nakadawat og singkuwenta mil pesos si Brendo gikan kang Segmund aron paboran siya ni Brendo. Gidawat ang malabong salapi kay palainom ug sugarol man si Brendo. Pwerteng lipaya sa gasang salapi.

“Pasagdahi na lang nang German. Divorced na bitaw mo. Puwede ka nang mangitag laing bana. Huwata na lang mamatay na diha sa inyong beach house sa San Demetrio!” hangyo mando ni Brendo sa iyang manghod.

“Dili mahimo Manoy. Una pa kong mamatay anang Alemana nga masamang damo!” tubag ni Gina. Niping-it ang tinan-awan ni Brendo. Ug nihait pagsamot nga nagpasiklap ni Glen dihas tapad ni Gina sulod sa Jollibee Banilad diin sila nagkonperensiya.

Karon, duna nay deportation order ang Aleman. Papahawaon na sa Pilipinas. Pagkasayod ni Brendo, nagpamente siya’s kalagot. Dihang niuli si Glen ug iyang kapikas nga si Minda sa San Demetrio, gihagisan dayon ni Brendo. Hapit kuyapi sa kahadlok si Minda nga manghod ni Brendo kay lisang gyud kaayo siya sa iyang maguwang sukad sa gagmay pa sila. Nikabadkabad sila’g biya sa ilang balay ug nibalik sila sa Canduman. Gusto untang mosukol si Glen ni Brendo. Apan nagpugong lang kay atakehon mas kasingkasing iyang asawa sa kalisang.

“Pa, ako nagpanghadlok gyud sa imong sitwasyon karon. Ayaw lang una pag-jogging mabuntag. Kay regular ra ba kaayo imong oras ug ruta. Basi’g unsay masulod sa utok sa German. Basig manabla o mangamong nga mawala na siya sa Pilipinas. Magsuhol unyag hired killer.” Malomong tambag ni Jessie kamaguwangang anak ni Glen sa niaging gabii.

“Broom! Broom! Broom!” nadungog ni Glen ang andar sa motorsiklo sa iyang likod. Nilingi siya.

“Uy! Asterio Miseyas ang garbo sa San Francisco, Camotes Islands?” mapahiyomong pulong ni Glen nga nitimbaya sa iyang amigo.

“Atorni. Duna koy isulti nimo. Tininuod gyud ning akong kabalaka,” ni Asterio.

“Ngano man? Unsa may imong nabalak-an?” ni Glen.

“Kuan. Gabii ba. Dunay nagmotorsiklo. Duha ka tawo. Puro nag-helmet nga putos gyud ang ulo. Di makita ilang nawong. Suspetsoso ug panglihok. Nangutana kun hain imong opisina. Wa nako tug-ani. Giingnan nako nga way Atty. Castro nga nag-opisina dinhing baryoha,” ni Asterio.

“Mao ba?” nakapanglad-ok og laway si Glen.

“Salamat Ter, ha. Usa ka gyud ka tinuod nga higala,” ni Glen. Giduol ug gilamano ang higala.

“Tumanon na nako imong tambag,” dugang niya. Nisulod siya sa gate sa Tanco Building. Ug nibalik si Asterio sa parkingan. (Kataposan)