Sukli sa utang

Gula 129

Nakabaton og diyotay’ng kausaban ang akong kinabuhi sa akong pagpakig-live in Davon. Relaks na ko kanunay kay naa ra man lagi ko sa gipuy-an namong apartment. Ang akong gimbuhaton sa balay gaan ra sab kaayo kay naanad na man ko niini sa didto pa ko sa Bicol.

Taas kaayo ko’g panahon sa pagdiskanso. Mao nga aron pagpukaw sa kalaay, kanunay kong motan-aw og mga salida sa telebisyon. Usahay dili makalingaw nako ang mga salida sa TV maong magpasalida ko’g DVD. Daghan og DVD tapes nga pinalit si Davon. Sagad mga pelikulang aksiyon, music video ug X-rated films. Ang X-rated movies maoy akong gikabuangan.

Apan may mga higayon gayod nga dili ko malingaw pagtan-aw sa bisan unsang salida. Maong magsuroysuroy ko sa mga mall. Duol ra man ang Makati gikan sa among gipuy-an sa Malibay nga nahisakop sa Pasay. Adto ko sa Makati magsuroyan. Magtapontapon lang ko sa pagsuroy sa Makati Square, Greenbelt, Landmark, SM City Makati ug Ayala Center Makati.

Matag adlaw mohatag og kuwarta si Davon nako alang sa akong panggasto. Wala na lang ko moreklamo nganong wala ko niya pagunita sa iyang suweldo. Wala man sab siya magkulang sa iyang kaakohan diri nako. Sobra na man gani kaayo ang allowance nga iyang ihatag nako matag adlaw alang sa akong mga panginahanglan.

Buhong, komportable ug malipayon ko sa akong pagpakig-live in kang Davon. Gikahatag gyud niya ngari nako ang tanan kong gikinahanglan, gikan sa materyal nga mga butang hangtod na sa panginahanglan kong sexual. Very hot sab si Davon sa sex mao nga wala na koy pangitaon. Kontento kaayo ko sa among panag-uban. Maayo siya’g performance sa sex mao nga natagbaw sab ko sa akong sexual life.

Dihay higayon nga buntag pa ganing sayo, ingon sa gibati ko’g kalaay sa balay bisan wala pa makagikan si Davon paingon sa trabaho. Mihangyo ko niya nga mokuyog ko ngadto sa iyang gitrabahoan aron sab makatultol ko. Pero mibalibad si Davon kay estrikto kuno ang ilang kompaniya. Dili kuno basta-basta nga makasulod didto ang dili empleyado mao nga wala na lang ko mamugos. Nangita na lang ko’g laing paagi nga malingaw ko.

Misuroy ko sa Glorietta sa Makati. Dihang gikapoy na sa pag-window shopping, misulod ko sa usa ka mahalon nga kan – anan ug naniudto. Pagkahuman, mipalit ko’g pan sa Liquieur de France. Gikadungan nako’g palit ang usa ka smart nga lalaki nga sa wala ko damha, mihagad sa pagpakig-ilaila nako. Siya si Ferdinand. -- Sumpayan pa