Ang Tinagoan

(Kining maong nobela gibase sa matuod nga kaagi ni Dinah).

Si Dinah morag kumi nga mipilit sa tiyan sa iho. Gihugtan niyag gakos si Rex. Sa ingon nga paagi, dili siya gustong mabiyaan sa lalaki ug makauna kinig sangko sa kinapungkayan sa himaya. Gusto siyang magdungan silag tikang sa kinaibabwang ang-ang sa ikapitong langit.

"Suod diay nimo ang bag-ong padre kura sa atong lungsod?" Takulahaw lang nangutana si Rex human sa ilang pagtagay sa kalipay.

"Nganong nakapangutana ka man og ingon niana?" sukit ni Dinah.

"May nakasulti nako nga dinhi ang pari kaganinang hapon sa imong gipuy-an. Maong nasayod ko nga wa ka mopauli ngadto sa lungsod karong Biyernes. Unsa bay gianhi sa pari?"

"Mibisita lang. Gikan siyang nagmisa sa barangay Pagatpat. Human sa misa nihapit siya dinhi ug nakigsultig kadiyot nako."

"Ingon niana na diay mo kasuod?"

"Hey! Morag lahi ka man og tonada? Nagselos ka?"

"Wa man. Pero ayaw'g kompiyansa nianang paria. Tingalig lain nag tuyo nimo. Naa ra bay ubang pari nga matinik sa tsiks."

"Wa kay angay kabalak-an kang Padre Josh. Ligdong siyang pagka pari."

"Basta, ayaw gyod pagkompiyansa niya." (Sumpayan pa)