Mahimong itik matag alas 8 sa gabii

Daghan ang nahibulong dinhi sa balangay sa San Juan sa kalit nga pagtumaw sa usa ka itik nga may bulok nga puti ug may sagol puntik-puntik itom ang mga balhibo niini. Motumaw lang kini matag alas otso sa gabii.

Gani, sa tindahan ni Balid-Masing nahatindog pagkalit ang nanag-inom nga bugoy nga sila si Masyong, Bart, Michael, Roger ug Candoy dihang mikalit lang pagtugdon sa ilang lamesa ang usa ka itik. Wala sila makalihok nga nakalitan sa ilang nakita. Hasta ang tag-iya sa tindahan nga sila si Balid-Masing nahasiga pod ang mga mata sa ilang nakita.

“Uy, katambok sa itik,” ni Bart pa nga naibog sa itik nga wa maglihok duol sa pitsil nga gisudlan sa bino nga ilang giinom.

“Nindot himuong pulutan,” mitingsi si Michael nga nagpanilap nga nagtan-aw sa itik.

“O, wa na tay problema kay duna na tay sumsoman. Atong ipaluto ni nang Masing kay maayo kaayo na siya mohimong patutin,” nagpahiyom si Candoy nga kasigniton na sa itik.

“O, unsa pay inyong gipaabot, signita na, bay Roger!” sugo ni Masyong ngadto kang Roger. Dihang signiton na unta ni Roger ang itik kalit lang kining milupad ug nahanaw pagkalit sa kangitngit.

“Sus, kaanugon!” Nakapanglitik sa iyang tudlo si Bart. Apan wala na ang itik. Ug silang tanan nahibulong kun diin gikan ang maong itik nga way nagbuhi og itik dinhi sa ilang balangay.

Sa usa ka payag nga nahimutang duol sa mamingaw’ng lugot nia magpuyo ang magtiayong Cosme-Sabel. Duna nay huhungihong bahin sa ilang pagkatawo nga sila kaliwat og ungo kay tal sila nga taga isla Kabankaban, ang gibantog nga daghan kaayong ungo. May anak sila nga dalaga nga ang pangalan mao si Conching. Maanyag si Conching ug naibog siya kang Michael. Bugoy kini si Michael pero may pagka mestisohon nga ulitawo. Sa gibuhat ni Conching nga didto siya motugpa sa lamesa sa nanag-inom ang mga bugoy nasuko si Cosme.

“Nganong didto ka man motugpa sa lamesa sa nanag-inom, ha, Conching?” singhag ni Cosme sa anak nga dalaga.

“Diha man god si Michael, Tay,” hinay’ng tubag ni Conching. “Mahal nako si Michael, Tay...”

“Hoy, Conching, dili siya angay nimo. Ang angay nimo mao si Ponso kay parehas siya nato, kaliwat sab og mga ungo,” morag nasuko na si Cosme.

“Nganong imo mang ipugos si Conching kang Ponso kun wala siya’y gusto niini,” mora’g milaban si Sabel sa iyang anak.

Wala na lang magdaghan pag langas si Cosme. Kalit siyang nahilom pero sulod sa iyang kahiladman dili gyud siya gusto nga si Michael ang mahimong hinigugma ni Conching.

“Mahal ko ikaw, Conching,” pasalig ni Michael. “Ikaw lang ang babaye nga akong higugmaon samtang nagpitik pa kining akong kasingkasing...”

“Apan, wala ka pa mahibawo sa matuod kong pagkatawo, Mike,” ni Conching pa nga wala motan-aw sa ulitawo.

“Nahibawo na ko, kun unsa ka, Conching. Dugay na kong naniid nagsunod-sunod nimo. Pero, di ko igsapayan ang imong pagka ungo...” ug gigakos ni Michael si Conching ug mibawos pod paggakos ang dalaga sa ulitawo.

Usa ka gabii dihang mibagting ang taknaan sa untop nga alas otso midali dayon og kanaog si Michael sa silong ug didto sa silong nagpaabot na si Conching nga usa na ka itik ug sa paglupad ni Conching nagsakay kaniya si Michael nga labihang lipaya, “Yahoooo! Woooooooowwwww! Kanindot diay kun nia ka sa taas sa kahanginan, no, Conching, bugnaw kaayo, yahoooooo! “Ug mipadayon si Conching paglupad paingon sa layo. (Kataposan)