Kaliwat sa sugarol

Ang apohan ni Mando numero uno na lang sa pagka sugarol, ilabi sa pagtari sa manok. Dili katingad-an nga nadawat ni Mando ang hilig sa iyang apohan. Daghan kaayo ang hiniktan nga manok nga igtatari ang Lolo ni Mando.

Sayes anyos pa lang si Mando nga nag-atiman sa mga manok sa Lolo Benjamin niya.

Sa dihang naulitawo na si Mando, misugod na siya pag-adto sa bulangan aron manugal didto. Hatagan og puhunan si Mando sa iyang apohan sa panahon nga ganahan siyang manugal. Dugang niini mosalga na si Mando sa mga derby sa panagtigi sa mga manok.

Unya, usa ka gabii niana samtang naglingkod si Mando diha sa lantay nga nahimutang sa ilang pantawan, kalit nga nadungog niya ang usa ka dakong igham ... Milingilingi siya aron pagsusi kun diin maggikan ang maong igham.

Sa wala damha, nabantaaw sa panan-aw ni Mando ang usa ka daw higanteng tawo nga itom kaayo, nagbahag ug naghukas lang kini. Nagtangag ang baba niini sa dakong tinustos nga dinagkotan ang tumoy.

"K-kinsa ka..?" nagkurog ang tingog ni Mando sa tumang kalisang.

Gigunitan dayon sa tuong kamot sa agta ang tinustos ug hinay nga miingon: "Ako ang agta nga nagpuyo niining punoan sa mangga nga akong gisandigan.

"Unsa may imong tuyo dinhi?" diha gihapon ang kalisang ni Mando.

"Ayaw lang kahadlok, migo, kay dili ako mangunsa. Hinunoa, gusto kong makighigala kanimo..." matud sa agta, mipahiyom. Labaw sa tanan, tabangan tika aron moasenso ang imong kahimtang.

"Daghang salamat kun mao..." niining tungora nahuwasan na sa kahadlok si Mando.

"Inigpanari unya nimo sa bulangan, mokuyog ako nimo. Ug pinaagi sa akong gahom ako na ang magpahigayon pagdiskarte aron ikaw kanunay ang makadaog sa matag sultada nga imong salmotan... Ho! ho! hooo! Apan sa dili pa kita magbulag, kinahanglan nga dili ka manulti nga managhigala kita. Kay kun dili mo kini tumanon, dili gyud kita magkita sa dayon..."

"Oo, higala, tumanon ko ang tanan nimong gisulti," hugot nga mipasalig si Mando.

Dali ra kaayo nga nadato si Mando sanglit natuman gayud ang gipasalig kaniya sa agta.

Apan nunot sa pagpanglabay sa panahon, wala makapugong si Mando pagbutyag sa tanan -- nga naka amigo siyag agta. Nga ang maong agta maoy mitabang kaniya aron maharuhay siya!

Tungod niini, hinanali usab nahanaw ang tanan nga bahandi ni Mando! Ug wala na gayud mopakita pa ang agta kaniya! (Kataposan)