Sukli sa utang

Gula 118

Mao na lamay akong naamgohan nga misunod na ko kang Davon pagkanaog gikan sa among gisakyan. Wala na ko mopakita’g pagtutol dihang iya kong giagbayan samtang nanglakaw mi paingon sa sulod sa reception. Wala sab koy tingogtingog. Gibati hinuon nako ang diyotay’ng kakulba pero wala ko makasabot kun kahadlok o kahinam ba ang hinungdan niini.

Human makapa-check in sa reception counter, nanakay dayon mi sa elevator paingon sa taas sa hotel. Samtang diha pa mi sa elevator, nakapangutana ko sa akong kaugalingon kun mipatigbabaw pa ba kanako ang hustong panimbang sa hunahuna. Mora man god og inanay na sab kong gidaog sa tawhanon kong kahuyang pagpaanod sa kahidlaw sa unodnong kalipay.

Humor ra gyud tingali ko’g ilong kay wala man ko morebelde sa pagdala ni Davon nako sa usa ka hotel bisan bag-ohay lang nakong gidawat ang iyang gugma. Nasayod na ko kun unsay seguradong mahitabo namo sa higayon nga makasulod na mi sa mabugnaw’ng lawak.

Pag-abot namo sa ikalimang andana, naabli ang pultahan sa elevator. Unang migawas si Davon. Gialalayan ko niya paingon sa gawas sa elevator. Paghitungod namo sa pultahan sa Room 508, gipasok gilayon ni Davon ang yawe nga iyang gigunitan ug gipasok kini sa yawehanan. Dayon gitukmod niya’g hinay ang palid sa pultahan. Unya misulod kami.

Misugat sa paghapuhap sa akong panit ang kabugnaw sa aircon sulod sa lawak. Nagbarog ko sa may tiilan sa kama nga ingon sa wala sa kaugalingon. Unya naalimatmatan ko dihang kalit lang kong gigakos ug gihagkan ni Davon. Giukoban niya’g maayo ang akong ngabil.

Wala ko makapugong sa akong kaugalingon. Gisuklian nako ang kainit sa mga halok nga gidaitol ni Davon sa akong ngabil. Wala ko mopakitag pagtutol dihang gihinay ko niya’g pahigda sa mahunolhunol nga kama ug unya gitagsatagsa pagpanangtang ang mga salimbong sa akong lawas. Kadali ra sab siyang nakahukas sa iyang gipangsul-ob.

Gikaligoan ko’g halok ni Davon samtang mikiat ang iyang mga kamot sa pagpanghinol sa sensitibong mga parte sa akong lawas. Hingpit nga mipa-undayon ang akong hunahuna ug pagbati sa iyang gihimo. Kadali ra kong nanginit.

Hingpit nang migahom kanako ang naghingapin nga kahinam sa sex. -- Sumpayan pa