Diha na si Lotis sa balay sa pag-abot namo ni Davon. Nakugang siya pagkakita nako nga may kuyog nga lalaki.
Gipaila dayon nako si Davon ngadto ni Lotis. Naglamanohay sila sa makadiyot. Kaswal ang ilang paghimamatay.
Wala madugay, nanamilit si Davon kay mopauli na. Gipahulat man god niya sa gawas ang taxi nga among gisakyan gikan sa Pasay.
Sa nakabiya na si Davon sa among gipuy-an, nakigsulti si Lotis nako.
“May bag-o na sab kang nabingwit,” nagkanayon si Lotis kun sa Binisaya pa kay gitinagalog man namo ang among panagsulti.
“Dili, uy,” giingnan ko siya. “Higala lang nako si Davon. Kababayan ko siya sa Bicol. Nanguyab hinuon siya nako kaniadto pero wala nako sugta.”
“Nganong gibalibaran man nimo ang iyang gugma?”
“Wa ko mahigugma niya.”
“Pero katudloan ang kasingkasing, Editha.”
“Duna ka pay angay masayran bahin kang Davon, Lotis.”
“Unsa man?”
“Ang iyang igsuon maoy nagpatay sa akong first love didto sa Bicol.”
“H-ha?”
“Mao kana. Adik ang iyang maguwang nga nipatay sa akong boyfriend.”
“Mao ba kanay hinungdan nga dili ka makadawat sa iyang gugma?”
“Dili. Niadto gong panahona, importante para nako ang akong feelings ngadto sa lalaki nga gusto kong ikarelasyon aron magmalipayon ko.”
“Karon diay?”
“Praktikal na ko. Sa kadaghan na sa mga panghitabo sa akong kinabuhi, morag liberated na ko’g hunahuna. Dili na big deal para nako ang gugma. Total, dili na man ko virgin.”
“Nga sa ato pa, puyde nang mag-on mo si Davon karon?”
“Depende.”
“Unsay depende?”
“Kun manguyab siya nako.”
“Mora’g dako’g posibilidad nga mao kanay mahitabo. Sa akong tan-aw niadtong lalakiha, morag dako siya’g interes nimo.”
Wala ko motingog. Si Davon maoy akong gihunahuna. -- Sumpayan pa