Sa kilid sa dakong krus

Hilabihang dasoka sa mga tawo nga nanagkot og kandela sa kumon nga dakong krus sa Queen City Garden ning unang adlaw sa kasaulogan sa Kalagkalag. Miuliot ko sa naghuot nga mga tawo ug gidagkotan ko ang dalang mga kandela-alang sa mga kalag sa mitaliwan na nakong mga ginikanan nga atua ilubong sa sementeryo sa among probinsiya.

Nakapanglingo ko. Atol ning kalagkalag karon, dili na nako makaya ang kamahal sa plitehan sa bus pasaheroan kun mouli sa probinsiya. Unsaon, igo ra tawon sa akong pamilya ang kinitaan ko sa panulat.

Nahaisa ang akong kilay ning hapona sulod sa sam-ang. Sa kilid sa dakong krus, nasigpatan ko ang pamayhon sa usa ka tawo nga sinati ko kaayo ang pamayhon. Dugay kong nahaunlod sa halawom nga panghunahuna. Husto! Siya gayud! Ang akong sangay! Siya gayud si sangay Al, ang usa sa idolo kong writer.

Kun mao, dili diay tinuod ang dugay na nga nabalita nga patay na nag sangay kong magsusulat. Nagsul-ob siya og barong tagalog nga brown ug karsones usab nga kape. Nagduko ang akong sangay sa kilid sa dakong krus.

Gusto kong pangumustahon si sangay Al mahitungod sa panulat. Tayming na ning higayona nga magkasulti mi, kay kapin na sa tuig nga wa na mi magkakita. Gipanid-an ko siya nga mobiya na sa kilid sa dakong krus. Tuod man, nasiklapan ko nga milakaw si Sangay Al gikan sa naghuot nga managkotay. Abtik ko siyang gisundan. Gisangpit.

"Sangay Al! Ngayyyy...!"

Daw wala madungog sa akong sangay ang pagsangpit ko kaniya. Sa kadasok sa mga tawo sa sulod sa Queen City Garden, kalit lang nga nawala si sangay Al sa akong panan-aw. Unya, nasugatan nako si agaw Mar, ang ig-agaw kong writer nga turkohon og panagway.

"Gaw Mar! Nanagkot sab diay ka...?"

"Oo, Gaw Al! Dali, ubani ko sa panteyon sa alalay tang writer. Managkot tag kandila sa lubong sa sangay mo ... si anhing Al...!"

Nahiugnok ko sa akong nadungog gikan kang agaw Mar.

"T-tinuod diay'ng patay na si sangay? Apan...!"

"Ay oo, uy! Ania dinhi ilubong si Al! Giatake baya siya sa sakit sa kasingkasing sa miaging tuig, Gaw...!"

Nakapanglingo ko. Karon pa lang gani nako makita si sangay Al nga nagtindog sa kilid sa kumon nga dakong krus. Apan patay na gayud diay siya?

Wala ko na lang sultihi si agaw Mar nga nagpakita kanako si sangay Al, kaganina lang. Abtik ang akong mga lakang nga misunod kaniya aron sa pagdagkot og kandela atubangan sa nitso sa akong sangay. Wala ko makasabot sa tinuod kong gibati niadtong higayona sa sulod sa Queen City Garden. (Kataposan)