Gula 8
(Kining maong nobela gibase sa matuod nga kaagi ni Dinah).
Dihang nakabiya na sila si Padre Josh ug mga kauban aron mopauli na ngadto sa lungsod sakay sa usa ka owner-type jeep, si Dinah misulod sa iyang kuwarto nga gisaog sa tumang kalipay.
“Yes!” Nakatuaw siya ug nagpanglitik sa iyang mga tudlo.
Nalipay siya nga misugot si Padre Josh sa favor nga iyang gihangyo. Nagtuo siya nga ingon sa nakasabot na tingali ang pari sa iyang tumong ug misugod na kini’g patol kaniya.
Naghinamhinam si Dinah sa umaabot nga panagkita nila ni Padre Josh. Gidula-dulaan sa iyang kaisipan ang unsa man nga posibleng mahitabo sa ila unyang panagkita sa umaabot nga Biyernes. Nagmugna-mugna siya’g romantikong mga eksena nga maoy gusto niyang mahitabo sa ilang panagkita.
Ingon niini si Dinah. Kun unsay iyang magustohan, dili gyud kini niya lung-an hangtod nga iya kining maangkon. Pilian siya’g lalaki. Pero kun siya sab maoy makagusto, dili siya mosugot nga mapakyas. Siya’y mangitag paagi nga mahiduol niya ang lalaki nga iyang nagustohan.
Sukad sa batan-on pa siyang dalaga ug hangtod karon nga propesyonal na siya, ang tanang mga lalaki nga iyang nagustohan nauyab gyud niya. Ug giuran-uran na niya ang sex. Hapit tanang mga lalaki nga iyang gikarelasyon nakatilaw sa iyang pagka babaye. Maisip kining conduct unbecoming alang niya isip usa ka magtutudlo pero ingon gyud niini si Dinah!
Usa ba siya ka buhing ilustrasyon sa dilemma of a modern woman? Liberated ba lang gyud siya’g hunahuna maong gusto niyang i-exercise ang iyang independence sa tanang aspeto sa kinabuhi? Ambot! Basta alang kang Dinah, may katungod siya pag-angkon sa tanang mga lalaki nga iyang magustohan. Maong himuon niya ang flirtation!
Naputol ang paghanduraw ni Dinah kang Padre Josh dihang may nanuktok sa pultahan sa iyang lawak. -- Sumpayan pa