Sukli sa utang

Gula 107

Wala ko makasabot sa akong gibati dihang nakita ko si Alva. Kusog kaayo ang pagbutokbutok sa akong dughan. Dili ko makasabot kun kahadlok bay hinungdan sa maong kakulba o kahinangop ba hinuon gumikan kay nakita ko ang lalaki nga nahimo kong kasalo pagtagay sa lawasnong kalipay sulod sa dugaydugay nga panahon.

“Sorry, Editha, ha,” ni Lotis pa. “Namugos man gyud siya nga mokuyog nako. Wa na ko makabalibad.”

“O-okey lang,” mikurog og diyotay ang akong tingog.

Si Lotis mihatag og higayon nga magkasulti mig maayo si Alva. Siya’y mitiwas og hikay sa among panihapon. Ug kami si Alva nahibilin sulod sa lawak. Hinuon, ang kosina dili ra layo gikan sa lawak nga among nahimutangan. Sa makadiyot mipataliwala namo ni Alva ang kahilom.

“Nganong nia ka man?” Akoy migisi sa kahilom.

“Nagsusi ko sa imong kahimtang dinhi,” tubag ni Alva. “Wa ka ba diay malipay nga mianhi ko?”

Wala ko motingog. Maulaw kong mopa-display sa matuod kong gibati. Pero kun nasayran pa lang ni Alva ang kalipay nga akong gibati nga nagkasulti kami, ambot lang kun unsay mamahimo niyang reaksiyon.

“Kumosta ka na man?” Nangutana si Alva.

“Maayo ang akong kahimtang, dinhi,” giingnan ko siya bisan nasinati ko ang kamiserable sa akong kinabuhi. “Buotan kaayo si Lotis nako.”

“Nalipay bitaw ko nga siya’y imong gidangpan.”

“Ikaw, kumosta na man ang pagpuyo ninyo ni Agaw Josie? Wa na ba mo magsige’g away tungod nako?”

“Hangtod karon wa pa gihapon siya’y maayong buot nako. Kanunay siyang sapoton. Wa ko na lang siya tubayi. Gipasensiyahan ko siya. Di ko gustong maapektohan ang bata nga iyang gisabak kun maguol siya.”

“Husto ang imong gibuhat. Angay gyud nga kita’y mopasensiya niya kay kita man maoy sad-an.”

“Mao sab bitaw kanay akong gihunahuna.”

Human sa among panagsulti, gitunolan ko ni Alva og kuwarta. Alang kuno sa akong panginahanglan. Panggasto. Mobalibad unta ko apan iya kining gipamugos. Nasayod kuno siya nga nagkinahanglan ko sa maong salapi. Hipokrita ko kun dili nako angkunon nga tinuod ang iyang gisulti. Busa, gidawat ko ang kuwarta nga iyang gihatag. - Sumpayan pa