Gula 3
Morag misugmat ang pagka-flirt ni Dinah sa unang higayon nga nakita niya si Padre Josh. Ingon na gyud siya niini sukad sa batan-on pa siyang dalaga. Flirt! Ug kun may lalaki siyang magustohan, dili siya sama sa ubang mga babaye nga moluom lang sa gibati. Si Dinah mopadayag gyud og mga gesture ngadto sa lalaki nga iyang magustohan.
Ug karon lagi, si Padre Josh maoy iyang natripingan. Guwapo si Padre Josh. Sa kaugalingon laging panud-ong ni Dinah, morag panagway si Padre Josh ni George Lazenby, ang usa sa mga aktor sa Hollywood nga nakadala sa papel ni James Bond 007 sa pelikulang “On Her Majesty Secret Service”.
“Timan-i, Day,” giingnan ni Dinah si Miriam. “Mauyab lagi nako nang paria! Tan-awa lang unya.”
Human masaulog ang santos nga misa, si Dinah nangita gyud og paagi nga mahimamat niyag personal ang pari. Si Miriam gilainan sa gihimo ni Dinah. Pero gipasagdan lang niya kini. Apan sa hilom nakaingon si Miriam nga morag nawagtang ang pagka propesyonal ni Dinah ug maoy mipatigbabaw ang iyang pagka-flirt!
“Sa akong tan-aw morag dali ra ming magkasinabot si Padre Josh, Day,” giingnan ni Dinah si Miriam samtang nag-ampad sila sa pagpanglakaw pauli sa tagsatagsa nila ka pinuy-anan. “Sa akong paniid morag playboy sab nga paria. Morag sipat kaayo sa babaye.”
“Nganong initan pa man gyud nimo si Padre Josh?” misikmat si Miriam. “Di ba may boyfriend ka na man?”
“Duna bitaw. Pero lahi si Rex. Ug lahi usab si Padre Josh. May talagsaong charisma si Padre Josh nga naka-impress nako. Nagbaton siya’g hiyas nga wala nako makaplagi kang Rex.”
“Pero usa ka pari si Padre Josh, Day.”
“Nasayod ko. Ug mao kanay naka-challenging!”-- Sumpayan pa