Sukli sa utang

Gula 104

Nakalitan mi si Alva sa among pagkakita kang Agaw Josie. Wala mi magdahom nga mokalit lang pagtungha si Josie sa canton factory nga among gitrabahoan. Kalit kong gikulbaan pagkakita nako sa akong ig-agaw.

“Di na gyud diay mo mapugngan, no,” nagkanayon si Josie dihang nahiduol na siya kanamo ni Alva. “Bisan nabunggo na mo nako, gipadayon lang diay gihapon ninyo ang inyong relasyon dinhi sa pabrika.”

“Mahimo ba, Josie,” badlong ni Alva. “Ayaw paghimog eskandalo dinhi sa factory?”

“Ngano man diay?” Gitulisok ni Josie si Alva. “Mauwaw ka kun mag-eskandalo ko? Wa man gani mo mauwaw sa inyong gihimo nako? Mga immoral mong dagko!”

Wala makatingog si Alva.

“Ug ikaw, Editha,” ako na usab ang giatubang ni Agaw Josie. “Nagpabaga ka na lang gyud sa imong nawong, no?”

Wala sab ko motingog. Ug aron walay mahitabong kagubot ug eskandalo, ako na lang ang milikay. Mibiya ko sa canton factory nga walay lingilingi dala ang bag nga gisudlan sa akong mga gamit.

Tungod sa kalagot ni Agaw Josie nako, nangita gyud siya’g paagi nga mataktak ko sa akong trabaho sa factory. Misumbong siya sa among employer nga Insek mahitungod sa relasyon namo ni Alva. Sanglit suod man si Alva ngadto sa Insek, ako ray gitaktak niini. Gisuweldohan hinuon ko niini’g sakto bugti sa akong pagserbisyo.

Maayo gani kay naluoy nako ang usa nako ka kauban sa trabaho sa nag-alagad pa ko sa canton factory. Siya si Lotis, taga Sariaya, Quezon Province. Sa nagtrabaho pa ko sa canton factory, siya’y labi kong suod. Iya kong gipapuyo sa kuwarto nga iyang giabangan sa usa ka boarding house nga nahimutang sa may Tambunting, dili layo sa Abad Santos LRT terminal. Naluoy si Lotis sa akong kahimtang bisan nasayod siya nga ako ra usab maoy mabasol nganong gihinginlan ko sa akong ig-agaw nga asawa ni Alva. Nabulgar na man sa canton factory ang relasyon namo ni Alva.

Nangita dayon kog kasudlan nga trabaho. Maulaw ko nga magsige lang og estambay sa gipuy-an ni Lotis. Misulay kog pangaplay sa usa ka pabrika sa medyas sa 7th Street sa Caloocan City. Pero nasagmuyo ko sa nahimong resulta sa akong pagpangaplay. Nahagbong ko sa interview maong wala ko madawat sa trabaho.

Niini, na-imagine nako nga miserable na gyud kaayo ang akong kahimtang. -- Sumpayan pa