(Kining maong nobela gibase sa matuod nga kaagi ni Dinah)
Nagsugod ang tanan sa usa ka misa. Una kadtong misa sa bag-ong kura paruko sa parokya ni Santa Angela. Si Padre Josh!
Mitambong sila si Dinah ug Miriam niadtong maong misa. Suod nga managhigala sila si Dinah ug Miriam. Magtinug-anay sila sa ilang mga sekreto. Kanunay sab silang magkuyog sa bisan unsang mga lakaw.
Sa edad nga 26, dalaga pa si Dinah. Usa siya ka maestra nga nag-alagad sa tulunghaang publiko. Katalirongan ra niya si Miriam, usa ka empleyado sa kagamhanang lokal sa ilang lungsod.
Ang pagtambong nila sa unang misa ni Padre Josh lahi sa mga misa nga gidumala sa nahaunang kura paruko sa Santa Angela nga ilang gitambongan. Kaniadto mahilomon silang mamati sa homiliya sa pari. Apan niadtong unang misa ni Padre Josh, ingon sa wala masulod sa hunahuna ug kasingkasing ni Dinah ang gibatbat sa pari sa homiliya niini.
"Guwapo si Padre Josh, no," nagkanayon si Dinah ngadto kang Miriam samtang nagwali ang pari. "Morag si George Lazenby."
"Hilom diha, uy," gibadlong siya ni Miriam. "Paminaw hinuon sa iyang giwali."
"Na-attract ko sa iyang kaguwapo, Day."
"Saba diha. Madunggan ka gani sa ubang manimbahay."
"Ngano man diay? Magbuot sila."
"Hinumdomi nga usa ka pari si Padre Josh."
"Pari bitaw. Pero nagtuo kong madala siya sa akong karinyo."
"Naunsa ka diha? Makasala baya ka's Ginoo nianang imong gipanulti."
"I don't care. Basta timan-i kini, Day. Makahigayon gani ko, tentalon nako kanang paria!" (Sumpayan pa)