Sukli sa utang

Gula 102

Wala nay rason aron magpabilin pa ko sa balay sa akong ig-agaw. Iya na kong gihinginlan. Bisan pa gani’g wala ko niya hinginli, angay na gyud kong mobiya sa ilang panimalay human nabuking ang kinawatkawat nga pagtagay namo ni Alva sa lawasnong kalipay.

Sanglit dili man ko daghan og mga gamit, kadali ra kong nakahuman sa pagpanghipos. Migawas dayon ko sa lawak nga walay tingogtingog. Si Josie nga nakalighot gikan sa paggunit ni Alva kalit nga midasmag nako ug gitukmod ko paingon sa hagdanan.

Diriyot ko mahulog sa hagdanan. Maayo gani kay nakagunit ko sa hawiranan niini ug wala gyud ko sa mahagbong ngadto sa ubos. Piangon unta ko kun nalahos pa gyud ko’g katagak.

Paggawas nako sa balay, akong namatikdan ang mga silingan nga nag-iyahay og panambo sa mga bentana sa ilang balay. Nangusyoso sila kun unsay hinungdan sa kagubot nga nahitabo sa balay sa akong ig-agaw. Samtang didto sa sulod sa balay, nabati ko ang tingog ni Agaw Josie nga ingon sa usa ka mangtas nga nangasaba kang Alva.

Midali ko pagbiya sa balay sa akong ig-agaw. Bahala nag magkamatay sila basta makapalayo na ko. Nagduko ko samtang paspas nga naglakaw palayo sa maong dapit. Wala ko motan-aw sa tsismosong mga silingan nila ni Josie. Mipaturatoy ko sa paglakaw.

Paggawas nako sa eskinita ug natukmaan na nako ang lapad nga karsada, misakay kog jeep. Pag-abot sa may eskina sa 10th Avenue ug Rizal Avenue Extension, mikanaog ko. Sa makadiyot mibarog ko sa daplin ug naghunahuna kun asa ko mopaingon.

Wala man god koy klarong tumong sa akong pagbiya gikan sa pinuy-anan sa akong ig-agaw. Nakalitan ko sa dagan sa mga panghitabo ning matugnaw nga kaadlawon. Wala koy tinong padulngan human mi si Alva nasakpan sa akto ni Josie nga naghilawas sulod sa kuwarto nga akong katulganan didto sa ilang balay.

Dihang hapit na mobanagbanag, milakaw ko subay sa daplin sa dalan paingon sa Ever Gotesco Grand Central. Pag-abot nako sa ilawom sa estasyonan sa LRT sa Monumento, mihunong ko. Mibarog duol sa usa ka sementong haligi diin sa duol may makililimos nga natulog.

Sa makadiyot gibati ko ang kamiserable sa akong kinabuhi. Kalit miblangko ang akong hunahuna. Wala ko masayod kun unsay angay kong buhaton. -- Sumpayan pa