Malag-it nga bato sa balisbisan

Mituang na ang ulan. Diha sa balisbisan, klarong nakita ni Lita ang malag-it nga bato nga kanunay'ng maigo sa tinulo sa ulan gikan sa atop sa ilang balay. Gikan sa bentana nga iyang gitamboan ning udtoha, nakapanglingo si Lita sa iyang nasaksihan karon.

Nalupyak na ang malag-it nga bato! Nakaghan! Gumikan kini sa tinulo sa ulan gikan sa atop nga mopatighulog ug modapat sa malag-it nga bato diha sa balisbisan. Nakapanghupaw si Lita nga nakahinumdom sa gipamulong kaniya ni Mariano, ang ulitawo sa ilang baryo nga bisan nasayod na kini nga manag-uyab na sila si Ronie, apan padayon pa gihapon nga nangulitawo kaniya.

"Sama nianang malag-it nga bato sa balisbisan, Lit, moabot da gihapon ang higayon nga makagdan ug mohumok ang imong kasingkasing alang sa akong gugma kanimo. Hangtod nga dili pa kamo makasal si Ronie, ipadayon ko ang paghalad kanimo sa tim-os kong gugma! Gihigugma ko ikaw!"

Alang kang Lita, si Ronie lang ang lalaki nga iyang gihigugma. Nagkasinaaray na sila. Nagpanumpaay nga magpakasal na sila inig-uli na ni Ronie gikan sa duha ka tuig na niining pagpanarbaho sa Saudi Arabia isip usa ka lisensiyadong civil engineer.

Si Lita usa usab ka eligible nga maestra sa elementaryang eskuylahan sa ilang baryo ug kauban niyang nagtudlo si Mariano kay usa usab kini ka eligible nga maestro. Sila si Ronie ug Mariano parehas nga katalirongan ni Lita sa ilang baryo ug klasmet pa gayud gikan sa elementarya ug hayskol. Nagkatibulaag silang tulo sa pagpadayon na og eskuyla sa kolehiyo, tungod kay lainlain na nga unibersidad ang ilang gitunghaan. Parehas nga nangulitawo sila si Ronie ug Mariano kaniya, apan ang nahauna maoy iyang gipili nga higugmaon.

Apan may kausaban ang dagan sa panahon. Bisan sulat o pag-text man lang sa silpon, wala na gayod magpakabana si Ronie kang Lita. Dili na usab kini makontak sa dalaga. Hilom nga gikaguol sa dalaga ang tanan, ilabi na nga nabaniog sa ilang baryo nga aduna na kunoy gikaipon nga nars si Ronie didto sa Saudi. Kanunay nga gitambagan si Lita sa iyang Papa Lito ug Mama Daylin.

"Ayaw pagpadala sa imong kaguol, Lita! Hikalimti si Ronie nga wa na gyud mahinumdom kanimo...!" maymay sa iyang Papa Lito kaniya.

Alang kang Lita, may punto usab ang iyang mga ginikanan. Sa dagan sa panghitabo sa iyang gugma, si Mariano ang gibati og kalipay niining tanan.

Mikubakuba ang dughan ni Lita. Gikan sa bentana nga iyang gitamboan karon, nakita niya si Mariano nga nagdangadanga sa ilang balay. Nagpahiyom kini nga nagwarawara sa iyang mga kamot. Mamisita na usab kini kaniya ning Domingoha. Tayming gyud nga maoy pagtuang sa makusog nga ulan. Karon pa lang, nabatyagan ni Lita nga inanay'ng mihumok na ang iyang kasingkasing kang Mariano. Sama sa malag-it nga bato nga nalupyak sa tinulo sa ulan. (Kataposan)