Sukli sa utang

Gula 98

Ang nahitabo namo ni Alva nasubli sa daghang higayon. Wala lang intawo’y kasayoran ang akong ig-agaw nga si Josie nga ang iyang bana nakigdula og kalayo uban kanako. Gidoble man god namo ang among pag-amping aron dili gyud makasabot ang akong ig-agaw nga ako ug si Alva kanunay nang magtagay sa lawasnong kalipay.

Gisal-angsal-ang lang namo ang adlaw nga mosulod mi sa motel. Sa among panagbagat, siya kanunay ang mohimo sa initiative; igo lang kong moayuda.

Sa balay, nag-amping gyud mi sa among mga lihok aron dili makasabot si Josie sa akong pagtukob sa iyang bana. Lisod na kun mabulilyaso. Delikado kun magkagubot ug mahitabo ang dakong eskandalo.

Sa factory nga among gitrabahoan, nag-amping gihapon mi si Alva nga dili makasabot ang among mga kauban sa trabaho nga kami adunay lahi nga pagtinagdanay.

Nanglabay ang mga adlaw. Nagpadayon ang tinago-tagong panagtagbo namo ni Alva sulod sa usa ka motel. Kontento kaayo ko sa performance ni Alva sa kama mao nga mora’g kinamayan ang akong mga adlaw. Maantigo gyud si Alva nga motagbaw sa lawasnong panginahanglan sa babaye sa kaugalingon niyang paagi.

Miabot ang akong 18th birthday. Gisultihan nako si Alva mahitungod niini. Iya kong gi-treat og panihapon sulod sa usa ka fastfood outlet sa Robinsons Malate.

Alas nuybe sa gabii na kong nakapauli sa Grace Park sa Caloocan. Nagmata pa hinuon si Agaw Josie. Naghulat siya nga mahiuli si Alva. Nasayod kong lawom nang gabii nga mopauli si Alva kay mao man kini ang iyang gisulti kanako kaganina. Pero wala nako tug-ani si Josie mahitungod niini. -- Sumpayan pa