Sulod sa langit

Tiya, ayaw palabi sa imong kaguol. Masakiton ka ra ba og kasingkasing, matud pa ni Lareza nga puno sa pagmahal nga mitambag sa iyang iyaan nga si Cynthia. Ang pagka masulob-on ni Cynthia dili bag-o. Tataw ug klaro kaayo nga dugay na siya nga naghambin niining kaguol nga nag-umido sa iyang dughan karon.

Wa maproblema si Cynthia sa mga material nga mga butang. Kay kun kwarta ang hisgotan grabe kadaghan ang iyang kwarta. Gani maglisod na siya og ihap ug gasto niini.

Ang nakasamok sa iyang alimpatakan karon mao ang iyang kapikas ug bugtong anak lalaki. Ang iyang kapikas nga si Marvin hilabihan ka baydor ug ka hakog. Napulo na ka babaye ang iyang nasayran nga nakigdulog sa iyang kapikas diha sa kama. May flight stewardees, aktres, fashion model, promo girl, commercial model, singer ug lain pang upat.

Gihulagway ni Cynthia ang iyang bana nga usa usab ka hakog. Kay magsige lang gihapon kini og tukod og mga balay patigayon bisan kun nagbaha na ang ilang kwarta.

Ang iya usab nga bugtong anak nga si Owen wa nay tahod kaniya. Dili na mo amen kaniya ug di na mananghid kun molakaw. Di na usab maminaw og tambag kaniya. Nag-drugs na kini ug bisan kinsa lay ipaangkan.

Napamalandong karon ni Cynthia nga kun dili pa siya usa ka deboto ni Birhen Maria ug dili pa hugot ang iyang pagsalig sa Diyos dugay ra siyang namatay sa konsomisyon. Si Cynthia usa usab ka magtutudlo sa Balaang Kasulatan.

Nisanag ang iyang panagway sa diha nga gidala siya sa mga pako sa iyang handurawan ngadto sa 2 Timoteo 1:2 sa Balaang Kasulatan. "Timan-i kini: mahimong malisod gayod ang kataposang mga adlaw. Kay ang mga tawo mahimong mapalabilabihon, mahigugmaon sa kwarta, hambugero, mapahitas-on, magsulti og daotan batok sa ilang isigkatawo ug sa Diyos, dili motuman sa ilang mga ginikanan, dili mapasalamaton ug dili Diyosnon.” (Kataposan)