Kalag sa bus terminal

Aduna diay mga tawo nga kun mamatay na di mahibawo nga patay na diay sila. Matud pa nga ang uban kanila pabiling magsuroy-suroy dinhi sa kalibutan sa mga buhi.

Usa kanila ang tawgon lang nato nga si Federico, usa ka kanhi kawani sa munisipyo sa lungsod sa Borbon, amihanang bahin sa lalawigan sa Sugbu.

Si Federico ang bugtong gisaligan sa iyang pamilya ug may unom siya ka mga anak. Nagpangidaron og 12 anyos ang kinamaguwangan ug singko anyos ang kamanghuran. Hapit maglinopong ang tubo nila.

Gumikan kay si Federico ra ang nanginabuhi, lisud gayud ang ilang kahimtang sa pagpuyo kay gamay ra man ang iyang sweldong madawat kuhaan pa sa mga nagkalain-laing iban sa kagamhanan sama sa GSIS ug uban pa.

"Pastilan kalooy sab sa akong bana, kanunay na lang nakong makit-an nga maghinoktok," matud pa sa asawang si Linda ngadto sa silingan niyang si Suzette.

"Kalooy sab bitaw ni Noy Rico, Manang. Di man gud sayon ang pagbuhi og daghang mga anak," tubag ni Suzette nga suod higala sa magtiayon nga nagtungha sa usa sa mga unibersidad sa siyudad sa Sugbu.

Magpaulian lang si Suzette sa ilang lungsod matag Sabado ug mobalik sa dakbayan sa Lunes sa buntag.

Usa ka adlaw niana, Sabado kadto ug didto sa bus terminal si Suzette aron mopauli sa ilang lungsod. Paingon na siyang mosakay sa bus pauli sa ila uban sa iyang higala sa dihang hikit-an niya si Federico nga daw mosakay na sa ilang bus.

"Noy Rico, diri na lang sakay!" singgit ni Suzette ngadto sa iyang silingan.

Apan wa kini manumbaling ug milahos gayud kini pagsakay sa laing mini bus.

"Oy, wa man lang ko panumbalinga ni Noy Rico, Bing? Kaduol ra aning atong bus nga sakyan pero wa gyud ko niya mabati bisan pa sa akong kusog nga singgit," matud pa ni Suzette ngadto sa iyang katagilungsod nga dungan niyang mosakay.

"Bitaw, Zet. Basin may lawom nga gihunahuna si Noy Rico maong wa makadungog sa kusog nimong sangpit." Tubag ni Bing nga nakaila ug nakakita usab ni Federico.

Talisalop na ang adlaw sa dihang miabot sa Suzette ug Bing sa ilang lungsod. Mao dayoy misugat ni Suzette ang balita bahin kang Federico.

"Luoya baya ni Rico, Zet. Wsa na tingali kaagwanta sa mga problema sa ilang pamilya," sugat nga balita sa inahan ni Suzette.

"Ha?! Kay ngano man diay, Ma? Kadungan pa gani namog sakay ni Bing si Noy Rico didto sa bus terminal sa siyudad. Lain lang ang iyang gisakyang mini bus," tingalang sukot ni Suzette sa inahan.

"Unsaon gud ninyo pagdungan og sakay nga namatay naman si Rico kagahapon? Nakit-an sa iyang anak didto sa duol sa iyang uma nga patay na ug may higot nga pisi sa iyang liog."

"Tinuod ka Ma? Pero di mi mahimong masayop si Bing sa among nakita kaganina didto sa bus terminal. Siya gayud kadtong misakay sa laing bus. Ang iya ganing gisul-ob kadto mang long sleeves nga polo shirt nga sagad niyang isul-ob kun moadto sa siyudad inig agi niya diri sa ato." Pahayag ni Suzette nga gibatig labihang katingala.

"Kun mao kana, tinuod diay kadtong gisugilon ni Lolo ninyo sa buhi pa. Aduna kunoy mga kalag nga magsuroy-suroy pa uban sa mga buhi kay nagtuong buhi pa sila."

Wa na makatingog si Suzette nga naghanduraw sa pamayhon sa kalag ni Federico nga misakay sa bus didto sa terminal. Sa iyang pangagpas mao diay'ng wa na manumbaling kaniya sa iyang pagtawag gumikan kay usa na diay ka kalag ang iyang gisangpit. (Kataposan)