Gula 135
Nagpadayon ang mano-manong panagsangka nila ni Dirk ug Bradley sulod sa prayer room. Gikuyawan ko kay ingon sa lupigon si Dirk sa kusog ni Bradley. Pareho silang nagkadugo na ang baba ug ilong. Samtang nagtan-aw nila, nangita ko’g paagi nga makatabang kang Dirk sa pagbuntog kang Bradley.
Gidasok ni Bradley si Dirk ngadto sa altar. Nangahulog ang mga rebulto nila ni St. Uriel, Sto. Niño ug Birhen sa Guadalupe. Gituok ni Bradley si Dirk. Ingon sa naglisod na paglihok ang akong bana. Mitikuka siya nga naglisod na pagginhawa.
Wala ko maakantos nga nagtan-aw kang Dirk nga ingon sa gilupig na si Bradley. Gipunit ko ang bangko ug gihapos sa bukobuko ni Bradley. Gisakitan siya nga naigo. Nahunong ang iyang pagtuok kang Dirk. Pero ako na usab ang iyang giatubang. Iya kong gitamparos. Nasukamod ko. Iya unta kong dapatan pag-usab apan gipatiran siya ni Dirk nga mao pay paghibangon. Nasukarap siya.
Unya, nakita ko nga gikuha ni Dirk ang espada nga diha sa kamot sa rebulto ni St. Uriel, ang Arkanghel sa Hustisya. Dihang mihamag si Bradley kaniya, iyang gitampok ang dughan niini sa espada ni St. Uriel nga iyang gigunitan. Mityabaw si Bradley sa kasakit. Nahagba kini sa salog nga naghayang. Mitaop pag-ayo ang espada sa dughan niini. Mikirig si Bradley. Nagsiga ang mga mata samtang naglunang sa kaugalingong dugo. Dihay kalayo nga migula sa ilong, baba ug sa samad sa dughan niini nga gidunganan sa kusog nga tingog nga milanog sulod sa prayer room. Pagkataudtaod, wala na maglihok si Bradley. Patay na!
Human sa maong hitabo, mibakasyon mi si Dirk sa Baguio. Gihatagan namog relief ang among kaugalingon human sa makalilisang nga pagpakigbatok sa instrumento sa demonyo. Pagbalik namo sa Sugbu, nakigkita mi ni Prof. Feder Vercelli. Ang psychic miingon nga nabuntog na namo sa hingpit ang incubus. Ang balaang espada ra diay ni St. Uriel ang gikinahanglan pagbuntog niini.
Nahibalik na sa normal ang pagpuyo namo ni Dirk. Wala na gayod manghasi namo ang incubus. -- Kataposan