Sukli sa utang

Gisugat namo ni Mama Clemencia ang doktor nga nag-atiman ni Papa Augusto nga migawas gikan sa intensive care unit. Nagpakisayod mi kun unsa nay kahimtang sa akong amahan.

"Padayon pa namong gi-obserbahan ang pasyente, Misis," si Mama Clemencia maoy giatubang ni Dr. Milton Marte. "Seryoso kaayo ang iyang kahimtang. Kinahanglang i-ampo ta siya."

"Ginoo ko," mao ray naluwatang mga pulong ni Mama.

Wala na lang ko magtingog. Naguol ko sa hilom. Dili ko gusto nga madisgrasya si Papa Augusto. Kun simbako mamatay ang akong amahan,dili tingali ko papahulayon sa akong tanlag.

Maayo gani kay nianang pagkaugma sa buntag, gipahibalo mi ni Dr. Marte nga luwas na sa kakuyaw ang akong amahan ug puyde na siyang igawas gikan sa ICU. Mora mig naibtan og tunok.

Gumikan sa maong hitabo, nakahukom kong mopalayo sa among dapit. Dili ko gusto nga akoy mamahimong hinungdan sa kamatayon ni Papa. Dili ko gustong magkalalis pa kami pag-usab tungod lang sa akong kakundatan.

Paggawas ni Papa Augusto sa tambalanan, nananghid dayon ko nilang duha ni Mama Clemencia nga moadto ko sa Manila. Sa sinugdan nagdumili sila pagsanong sa akong plano.

"Aron adto ka na sab didto magkundat," nagkanayon si Mama Clemencia.

"Dili, Ma, uy," nako pa. "Gusto kong manimpalad didto. Laay kaayo kun magsige'g estambay dinhi. Total, wala man sab ko moeskuyla."

"Mosugot mi nga moadto ka sa Manila," misal-ot sa pagsulti si Papa. "Basta mosaad ka nga mag-usab ka na sa imong kinabuhi."

"Isaad nako, Pa," giingnan ko siya. "Nitagam na ko tungod sa nahitabo nimo."

Misugot ra gyod ang akong mga ginikanan nga moadto ko sa Manila. Pero wala ko makaseguro kun makahimo ba ko pagtuman sa akong gisaad nila nga magbag-o na ko sa akong kinabuhi. Kadali ra ba kong buntogon sa kahuyang, labina sa tentasyon sa unodnong kahangol.

Pagka sunod semana, migikan ko paingon sa Manila. Didto ko moabot sa pagsaka sa gipuy-an sa akong ig-agaw nga si Josie, igsuon ni Lisa. Wala ko maglisod pagtultol sa iyang address sa 10th Avenue, Grace Park, Caloocan City. Buotan ang bana ni Josie ug misugot kini nga sa ilang balay una ko mopuyo. (Sumpayan pa)