Angso pa sa ihi sa iring

Diriyot makuyapi si Bador, nga maoy iyang nasingo ang kaangso sa kabaho nga nangalisngaw sulod sa pinuy-anan ni Iska. Maikog man god si Bador nga iya pang pangutan-on si Iska, diin magagikan kining maong baho, kay basin dili na hinuon siya atubangon? Sukad god siya nabiyudo kang anhing Noring, nakahunahuna na siya nga iyang ulitawhan si Iska, nga sama kaniya usa na usab ka biyuda.

"Ngano man Bador ... nga mingislo man ang imong nawong? Aduna ka bay napanimahoan sulod ning akong balay?" nagpusotpusot ang pangutana kaniya ni Iska.

"May talagsaon man god nga kahumot nga nanuhotsuhot sa akong ilong?" daling tubag ni Bador.

"Mao ba? Maayo hinuon?" mapahiyomon ang hitsura ni Iska.

Dili ikalimod nga ning ilang balangay sa Kabatbatan, bisan tuod anaa na sa kahamtong si Iska sa iyang panuigon, nagpabilin gihapon ang kabus-ok sa iyang lawas, ilabi na gayod sa kais-is sa iyang pamanit. Kay sa iya god nga kaminyoon kanhi ni anhing Masyong, wa gayod mausab ang kaanindot sa pagkalalik sa iyang lawas, ilabi na nga wa gayod sila makabaton og anak.

"Unsa na Bador ... unsa may angay kong ikaalagad kanimo?" kalit lang nahagtos ang kahalawom sa paghanduraw ni Bador sa pangutana kaniya ni Iska.

"Dili ko na lang dugaydugayon pa Iska ang akong katuyoan," nagkayuring ang sinultihan ni Bador.

"Bahin sa unsa man kana Bador?" maikagon nga nagpakisayod si Iska.

"Nga ako nahigugma kanimo ug andam nga mohatod kanimo sa altar sa kaminyoon!" way lipodlipod nga mipadayag si Bador ngadto ni Iska.

"Daan ko na ikaw nga gihigugma Bador!" daling tubag ni Iska dayong gakos sa tumang kahugot ni Bador.

"Miyawwwww ... miyawwwww!" maoy nasawod sa dunggan ni Bador ang miyaw sa iring ni Iska.

Mao na lamang ang nakita ni Bador nga mipatil-is sa pagpangihi ang iring ni Iska. Ambot unsang pagkaunsaa nga sa dihang naduol si Bador sa may bilahan ni Iska may talagsaon man nga kaangso nga iyang napanimahoan? Seguro giihian kini sa iyang iring?

Igo lamang mipahiyom si Iska ug nagkanayon:

"Kun tinuod ka nga nahigugma kanako Bador ... andam ka nga mag-antus sa kaangso sa akong ihi ... nga labaw pa sa kabaho sa ihi sa akong iring!" (Kataposan)