Depressed kaayo ko sa nahitabo nako. Bisan dili nako tinuyoan ang nahitabo nako apan naulaw gihapon ko ngadto ni Dirk. Nakakita man sab god siya sa pag-angkon ni Bradley sa akong pagka babaye kay nakamata man siya sa akong pagsinggit.
Sa gibuhat ni Bradley nako, gibati ko na ang naghingapin nga kasilag ngadto kaniya. Lakip si Dirk nasilag na kaniya. Giputol na sa akong bana ang paghinigalaay nila ni Bradley tungod kay wala man kini motuman sa ilang gentlemen's agreement.
"Di kaha mausab ang imong pagbati alang nako, Sweetheart, karon nga maisip na akong usa ka rape victim?" Gipangutana ko si Dirk aron pagsukod sa iyang gibati.
"Di kana mahitabo, Ingrid Sweetheart," niya pa. "Di nimo kagustohan ang nahitabo. Si Bradley ang sad-an sa tanan."
Pagkaugma, mikuyog ko ni Dirk sa buhatan sa kapolisan aron ipa-blotter ang nahitabo nako. Andam kong moatubang sa bisan unsang eskandalo basta mahatagan lang og hustisya ang nahitabo nako. Gusto kong madakpan si Bradley ug mataral sa hukmanan. Andam kong moatubang sa korte aron iduot si Bradley sa kasong pagpanglugos.
Nalutsan gyod og warrant of arrest si Bradley. Apan napakyas ang mga polis nga buot untang moposas kaniya kay wala kini sa iyang gipuy-an sa dihang ilang gisilbi ang warrant of arrest. Sumala sa iyang mga ginikanan nga maoy nahinabi sa mga polis, tulo na ka adlaw nga wala mopauli si Bradley. Sa akong pagsabot, ingon sa nagtagotago na ang kanahan aron dili masakpan sa mga tinugyanan sa balaod.
Apan ang kapolisan wala mohunong sa pagpangita niya. Nagtuo ang mga tinugyanan sa balaod nga wala mogawas sa Sugbu si Bradley. Gihugtan na ang pagbantay sa mga possible exits niya kun makahunahuna siya'g tabok ngadto sa laing probinsiya. Busa naglaom ming madakpan gyod siya sa madugay o sa madali.
Usa ka gabii niana, nahigmata ko kay ingon sa natay-og ang balay sa linog. Nauyog ang kama ug milihok ang mga butang sulod sa kuwarto. Akong gipukaw si Dirk kay mibati kog kahadlok. (Sumpayan pa)