Santilmo sa underground

Karaan ang balay sa mga Mendez nga nahimutang sa usa ka bungtod nga nag-umbaw sa balangay sa Matin-aw. Dihang namatay si Mr. Gabriel Mendez tungod sa usa ka sakit nga mitakboy sa iyang lawas, wala dangtig dugay misunod pod dayon ang iyang asawa nga si Lucia ug ang ila na lang anak nga si Benito ang nagpuyo sa karaang balay.

Dato si Mr. Mendez kay daghan siya’g mga patigayon ug si Benito ang nakasunod sa iyang katigayonan ug lakip na ang mga dagkong kayutaan sa ubang lugar.

May kauban si Benito sa balay nga karaan ug kini mao si Fermin, ang sinuholan ni Benito nga maoy moatiman sa taas ug sa silong sa balay lakip na ang mga tanom sa hardin. Ning pag-inusara ni Benito may gikabuangan siyang usa ka batan-on nga babaye nga nagtrabaho sa usa ka bar sa siyudad.

Maanyag kini ug matag gabii dad-on ni Benito sa ilang balay nga karaan ug didto iyang tagbawon ang iyang kaugalingon sa maanindot kaayong lawas sa dalaga.

Matag gabii dad-on gyud niya ang maong babaye sa karaang balay. Daghan ang makasaksi nga mga silingan nga makakita kang Benito nga dunay kauban nga babaye sakay sa iyang kotse.

Duha ka buwan ang milabay ug mao na lay nahibaw-an sa mga silingan nga milarga si Benito sa Amerika kay may iyaan man usab siya didto, igsoon sa iyang amahan. Gibilin niya ang balay kang Fermin ug matag buwan magdawatan og suweldo si Fermin kang Benito nga ipadala niini gikan sa Amerika.

Unya usa ka gabii samtang nanglimpiyo si Fermin sa silong miabli pagkalit ang pultahan sa underground ug may misidlit nga kalayo nga morag bola ang gidak-on, unya misidlit kini nga morag hamagan si Fermin.

Mikaratil si Fermin pagdagan nga mibiya sa dako ug karaang balay. Dili na matulog si Fermin sa balay magabii ug sa adlaw na lang siya manglimpiyo sa karaang balay. Unya, usa ka adlaw miabot si Benito ug gipahibawo si Fermin nga ibaligya na ang karaang balay ug dunay mopalit nga taga America nga gusto nang mopuyo sa Pilipinas.

Batan-ong magtiayon sila si Grace ug Ronald nga maoy nakapalit sa karaang balay. Mihangyo si Benito nga si Fermin lang gihapon ang ilang himuong sulogoon sa balay. Miuyon ang magtiayon. Tuod, usa ka gabii dihang misulod si Ronald ug Grace sa lawak sa underground, migawas ang usa ka santilmo. Misidlit kini. Unya, kalit lang nahimong babaye, naghilak kini nga namulong:

“Ako si Daniela, gipatay ug unya gilubong ni Benito dinhi sa underground sa balay...tabangi tawon ko ninyo...kay dili mahimutang ang akong kalag. Nia ning akong gibarogan ilubong ni Benito ang patay kong lawas...iya kong gipatay kay gusto niya nga dili na ko niya pagawason dinhi sa karaang balay....huuuuu...huuuu...huuu...”

Ug misagitsit na pod ang bolang kayo nga kalit lang nawala.

Gipakubkob nila ni Grace ug Ronald ang patay’ng lawas ni Daniela. Gi-report nila sa mga polis ang maong hitabo ug si Benito kay wala pa man kalarga balik sa America, gidakop dayon ug gipasakaag kaso nga murder.

Sukad niadto, wala nay santilmo ang karaan nga balay. Ug si Fermin miasoy nga wala gyud siya’y kalibotan sa krimen nga gibuhat sa iyang amo. Pagka-ugma sa gabii, may santilmo nga misidlit gikan sa hardin ug nakuyawan si Fermin. -- Kataposan