Naputos sa itom nga aso ang lawas sa bata nga naigo sa bendita. Kaming tanan wala makalihok sa among nasaksihan. Nagpadayon pagwisikwisik og bendida si Fr. Dean Ejara. Nagpadayon sab paghilak ang bata nga naputos sa bagang aso. Lakip gani ako ingon sa maputos sad sa aso kay duol ra man nako ang bata.
Pagkilab sa mga gutling, may nadungog ming lanog nga tiyabaw nga diha ra manukad sulod sa lawak. Apan wala miy nakitang tawo nga maoy tag-iya sa maong singgit. Mibandabanda sulod sa lawak ang kusog kaayong tiyabaw.
Unya, dihang nawala na ang tiyabaw, morag gilinog ang among nahimutangan. Dayon mihuros ang kusog kaayong hangin. Daw may alimpulos nga nakasulod sa ward sa hospital nga among nahimutangan. Ug nadungog namo ang lanog kaayong buto.
Human niadto, kalit lang nahanaw ang itom nga aso nga miputos sa bata. Nakugang mi pag-ayo kay wala na ang bata sa akong kiliran. Nahanaw kini!
"Kahibulongan kining hitaboa," nakatuaw si Padre Ejara.
"Gikuha ang bata sa amahan niyang incubus," nagkanayon si Prof. Feder Vercelli.
Ang maong hitabo nakapaukay sa mga tawo sa hospital. Dihay taga media nga buot mosusi ug manguhag kasayoran kalabot sa bata nga akong gihimugso nga misteryosong nahanaw. Apan naghimo mig total news blackout aron dili na modako ang maong isyu.
Maayo gani kay walay laing pasyente sa ward nga akong nahimutangan busa walay laing nakasaksi sa nahitabo sa bata gawas lang namo ni Dirk, Fr. Ejara ug Prof. Vercelli busa dili lisod ang paghimog news blackout.
Paglabay sa duha ka adlaw, migawas na ko sa hospital. Sa balay, gipapahulay ko ni Dirk. Diha sab ang akong mga ginikanan nga mitabang og atiman nako.
Ingon sa bale-wala lang nako ang misteryosong pagkahanaw sa bata nga akong gihimugso human benditahi sa pari. Ingon gani sa nalipay ko nga nahanaw na ang anak sa daotang espiritu. Maglagot kong maghunahuna nga usa ka incubus ang amahan sa bata. Gipaantos man god kog maayo sa maong daotang espiritu. (Sumpayan pa)