Pakigharong sa kakulian

Ang crutches (ayuda sa usa ka tawo nga dunay kakulian sa paglakaw) nahimo nang tipik sa kinabuhi ni Ronie. Naingon siya niini sanglit ang iyang kabus nga inahan wala mopabakauna niya batok sa sakit nga polio sa bata pa siya.

Karon ulitawo na si Ronie. Apan bisan pa niining kakulian niya sa panglawas, nabawi ra kini tungod sa kalantip o kahait sa iyang salabutan. Gani, usa siya ka scholar sa iyang pag-eskuyla. Ug sa grasya sa Diyos, nahimo siyang computer engineer.

Sa kasamtangan, si Ronie ang gisaligan nga magdumala sa usa ka internet cafe nga gipanag-iya sa usa ka dato nga magpapatigayon.

Usa sa mga higala ni Ronie mao si Dodong. Sa ilang panagkita usa ka adlaw niana.

"Bay Ronie, komusta man ka?" matud ni Dodong human sila maglamano; pulos sayag ang ilang mga panagway.

"Ah, sa kaluoy sa Diyos, maayo man gihapon," ni Ronie pa.

 “Kining... wa ba gyud ka maguol o mahasol sa imong kahimtang?” Seryoso kaayo si Dodong nga nagpakisayod.

"Wa man gyud bisan gamay," ni Ronie sa gaan nga paningog, mipahiyom pa gyud.

"Giisip ko na nga mao kiniy akong kapalaran ug pagbuot sa Kahitas-an."

"Ah, diay ba? Aw, lain pay ato, Ron, unsa may imong plano sa imong kinabuhi?"

"Maoy akong giampo nga duna na unyay buotan nga babaye nga akong ikahibalag nga tinuod gayud nga mahigugma nako - sa walay pagsapayan sa akong apan," tigson nga tubag ni Ronie. "Sa laing bahin, ang maong babaye mao usay akong gihigugma."

"Oo. Ug kun magkasinabot na kami, magtigom ko sa akong suweldo aron mao unya kiniy among himuon nga puhonan sa negosyo. Ug sa husto nga panahon unya, magminyo kami aron tumanon namo ang sugo sa Ginoo nga "Go to the world and multiply." (Kataposan)