Alang nako, makapakurog ang giasoy ni Prof. Feder Vercelli. Daw dili katuohan. Sama kini sa usa ka nightmare alang nako. Morag makalibog nga panghitabo. Apan kombinsido ko sa gisugilon sa psychic. May sukaranan ang iyang vibration.
Ang nakapakombinser nako nga tinuod ang gisulti ni Prof. Vercelli nga usa ka evil spirit nga incubus ang nanghilabot nako mao nga dili gyod maalaim sa bisan unsang tambal ang pagpangatol sa akong sexual organ. Gawas niini, imposibleng mombados ko kay baog man si Dirk segun sa findings sa usa ka uro-genito specialists nga naghiling niya. Katuohan ang giingon ni Prof. Vercelli nga ang incubus maoy amahan sa akong gisabak tungod kay makig-intercourse man ang maong daotang espiritu nako sa panahon nga matulog ko.
Mao diay nga mahigmata na lang ko gikan sa lawom nga paghinanok gumikan sa kakatol sa akong genitals. Nakighilawas diay nako ang incubus sa maong higayon. Mao diay nga dili gyod maalim sa medical nga paagi ang nasinati kong kakatol sa akong genitals kay mugna man diay kini sa pagpanghilabot sa daotang espiritu. Wala gyod ko masayop sa akong pagtuo nga gidaotan ko sa usa ka daotang espiritu.
"Unsa may among buhaton, Professor," gikan ni Dirk, "aron masulbad kining problemaha?"
"Walay makalabaw sa gahom sa Dios, Dr. Salcano," nagkanayon si Prof. Vercelli. "Idangop ta kaniya ang tanan. Kinahanglang magpamisa mo dinhi mismo sulod sa inyong panimalay. Kinahanglang mabenditahan ang tanang bahin sa sulod sa balay. Labaw sa tanan, kinahanglang mabantayan ang pagkahimugso sa bata nga gisabak ni Doktora Salcano aron mabenditahan dayon kini."
"U-unsay mapaabot namo, Professor," akoy nangutana, "kun ikahimugso ko na unya kining bata nga akong gisabak?"
"Mas grabeng trahedya sa inyong kaminyoon ang inyong masinati kundili ma-neutralize ang gahom sa demonyo nga anaa sa lawas sa bata," sa psychic pa. "Busa kinahanglang mabenditahan dayon siya." (Sumpayan pa)