Gula 105
Wala motubag si Prof. Feder Vercelli sa akong pangutana. Igo lang siyang miginhawa’g lawom nga gisundan sa pagpanglingolingo.
“Pasabta mi’g maayo, Professor,” gikan ni Dirk.
“Ayaw pagpanuko sa pagtug-an kanamo sa tanan nga imong nadiskobrehan, Prof. Vercelli,” giingnan ko ang psychic.
Mitan-aw si Prof. Vercelli nako. Unya giliwag niya ang iyang panan-aw ngadto kang Dirk. Unya mibalik na usab siya’g tan-aw nako.
“May problema kamo mahitungod nianang bata nga imong gisabak, Doktora Salcano,” nagkanayon si Prof. Vercelli sa sinultihan nga tugob sa kaligdong.
“Nga-nganong nakasulti ka man og ingon niana, Professor?” Si Dirk ang nangutana.
“Tungod kay dili ikaw ang amahan sa bata nga gisabak ni Doktora Salcano,” laktod nga tubag sa psychic sa pangutana ni Dirk.
“U-unsa?” Nakugang si Dirk nga mituaw.
Hasta ko nakalitan sa gipadayag sa psychic.
“Mao kana, Mr. Salcano,’ giingnan sa psychic si Dirk.
“Pero imposible kana, Professor,” miinsister si Dirk.
“Nasayod kong maglisod ka sa pagtuo niini, Mr. Salcano,” matud sa psychic. ‘Apan mao kana ang kamatuoran nga akong nadiskobrehan.”
“Apan naunsa man kining pagkahitaboa, Prof. Vercelli?” Akoy nangutana.
“May astral and ghostly entity nga nagpuyo ning inyong balay,” pasabot sa psychic.” Ang maong espiritu maoy nanghilabot kanimo, Doktora Salcano. Ang maong nature spirit gitawag og incubus.”
“U-unsa man kana siya?” Midugang ko’g pangutana.
“Ang incubus usa ka evil spirit nga makighilawas sa usa ka babayeng natulog,” matud sa psychic. “Siya ang naghasol nimo kanunay. Siya’y hinungdan sa pagkatol sa imong genitals kun makig-intercourse na siya nimo. Ug labaw sa tanan, siya’y amahan sa imong gisabak.” -- Sumpayan pa