"Incubus"

Misugmat ang pagpangatol sa akong sexual organ. Nahisagmuyo ko pag-ayo sa maong hitabo. Gipakaingon ko bag magdayon na ang  hapsay kong pamatyag sa akong genitals. Gipapahulay man lang diay ko’g usa ka semana sa kakatol kay misugmat na man usab kini karon. Katol kaayos tanan!

Misulod ko sa banyo ug gihugasan ang akong sexual organ. Giaplayan ko kini og feminine wash. Maayo na lang kini nga pugongpugong kay sa mag-antos gyud ko sa hilabihang kakatol. Bisan dili mawagtang sa hingpit ang kakatol apan mabentaha man og diyotay kun ako nang aplayan og feminine wash.

Inanay nga nawagtang ang kakatol sa akong genitals paglabay sa kapin usa ka oras. Nakatulog ko’g balik. Sa akong pagmata pagkabuntag, wala na si Dirk sa akong tupad. Migawas ko sa lawak. Didto na diay si Dirk sa kosina, naghikay sa among pamahaw. Misulod ko sa prayer room aron pagtuman sa akong morning rituals.

“Mo-report ka ba sa imong trabaho karon, Sweetheart?” Gipangutana ko ni Dirk samtang namahaw kami.

“Nausab ang akong hukom, Sweetheart,” nako pa. “Mora man og gikapoy ko’g maayo. Bug-at kaayo ang akong lawas karong buntaga.”

“Kun mao...pahuway lang una. Total, nag-sick leave man ka.”

Diha ra ko sa balay sa tibuok adlaw. Si Dirk mi-report sa iyang trabaho. Walay puas ang among pagteksanay samtang didto siya sa buhatan sa kapolisan. Kanunay siyang nag-monitor sa akong kahimtang.

Milabay ang usa ka semana. Wala pa gihapon ko makabalik og report sa hospital nga akong gialagaran. Padayon kong nag-antos sa kakatol sa akong sexual organ nga mosugmat matag gabii. Inanay na kong nawad-an og paglaom sa akong kahimtang.

“Kinahanglang mamaayo ka, Ingrid,” ni Dirk pa, “aron dili maapektohan ug madaot kanang bata nga imong gisabak.”

“Morag wa na tingaliy kaayohan kining sakit sa akong genitals, Sweetheart,” maluyahon kong namulong. -- Sumpayan pa