Gula 97
Pulos laway ang akong gisuka. Mora’g mahabwa ang akong tinai sa kalain sa akong ginhawaan. Giduot nako ang akong kuto-kuto aron makadigwa ko’g maayo.
“Naunsa ka, Sweetheart?” Sukit ni Dirk nga misunod nako sa banyo.
“L-lain kaayo ang akong ginhawaan, Sweetheart,” laktod nakong tubag.
Ug misuka na sab ko. Si Dirk na maoy miduot sa akong kuto-kuto. Nangamig ang akong lawas. Bugnaw sab ang akong singot nga migawas sa akong pagsuka.
“Tingalig may gikaon ka nga maoy nakadaot sa imong ginhawaan,” gikan ni Dirk.
“Ambot lang,” nako pa. “Basta, lain gyud kaayo ang akong ginhawaan.”
Misuka pa gyud ko pag-usab. Pagkahuman, ingon sa miarang-arang ang akong gibati. Inanay nga milurang ang kaluod sa akong ginhawaan.
“Pahuway lang una,” ni Dirk pa. “Adtoon ko si Mama Dortha kun nakaluto na ba siya sa atong pamahaw. Dad-an ko na lang ikaw og pagkaon dinhi.”
“Ikaw ang mag-igo, Sweetheart,” giingnan ko siya.
Migawas si Dirk sa among lawak. Pagbalik niya, nagdala na siya’g mga pagkaon. Gipahimutang niya ang tray nga gipatongan sa mga plato sa ibabaw sa lamesita nga nahimutang sa ulohan sa kama.
“Ato ning duha,” niya pa. “Gusto kong magsawo tag pangaon karong buntaga.”
Mibangon ko aron mokaon. Gialalayan ko ni Dirk aron dali ra kong makabangon. Unya gipaduol niya nako ang usa ka bangko aron maoy akong lingkoran. Mipahimutang dayon ko sa atubangan sa lamesita nga gipatungan sa mga pagkaon.
Misugod dayon ko’g hungit. Apan wala pa gani ko makausap, misuhag ang akong ginhawaan. Luod kaayo. Dihadiha midali ko’g sulod sa banyo ug midigwa. Mipasad sa lababo ang mga pagkaon. Pagkahuman, pulos na laway ang akong gisuka.
“Unsa na man sab kaha ning nahitabo nimo?” ni Dirk nga misunod nako.
Wala ko motubag. Unya, dihay misantop sa akong hunahuna. Kalit lang kong gikulbaan pagkahinumdom nako niini. -- Sumpayan pa