Tulay giguba sa politika

Parehas nga nahisagmuyo sila si Mel ug Angel ning ilang panagkita karon sa daplin sa sapa sa  sityo Himaya. Mga haligi na lamang sa tulay ang nagbarog sa sapa nga nagdugtong sa sityo ngadto sa baryo Paraiso. Giguba na ang tulay nga mao ang kanhi nilang abotanan sa hilom nilang panaghigugmaay.

Ug tungod niini, wala nay  mga sakyanan nga makalahos sa sityo Himaya. Maglisod na ang mga lumolupyo sa sityo sa inadlaw nilang gimbuhaton ilabi na sa pagtumod sa ilang mga produkto sa umahan ngadto sa lungsod. Gikinahanglan pa nga moubog sa sapa, una pa makaabot sa pikas tampi sa baryo Paraiso, diin anaa ang halapad nga karsada alang sa mga sakyanan.

"Angel, kita lamang duha ang makapabarog pagbalik sa tulay sa sityo Himaya. Hangyoa ang kapitan mong amahan nga tukoron pagbalik ang gipaguba niyang tulay...!"

"Oo, Mel! Tungod sa politika ug sa tagsatagsa ka mga garbo, wa na gyu’y panaghiusa ang kapitan kong amahan batok sa kanhi kapitan mong amahan. Ang atong tagsatagsa ka gugma, Mel, mao na lamang ang makasulbad ning problemaha. Ang atong kaminyoon mao na lamang ang bugtong paagi nga magkauli ang maayong kabubut-on nila ni Papa ug sa imong amahan. Pinaagi kanatong duha, paninguhaon nato nga mahibalik pagtukod ang tulay nga nagdugtong sa sityo Himaya ug baryo Paraiso, aron dili na maapektohan ang tanang lumolupyo sa sityo....!"

Si Kapitan Erning nga bag-o lang napiling barangay kapitan sa Paraiso, mao ang amahan ni Angel. Gipaguba niini ang tulay nga nagdugtong sa sityo Himaya, diin nagpuyo si Mel, tungod sa kalagot kang Noy Gundo, ang kanhi kapitan sa Paraiso. Naserohan man gud si Kapitan Erning sa mga botos sa tibuok sityo sa nakalabay'ng barangay eleksyon. Bisan pa man kun si Kapitan Erning gyud ang migulang mananaog sa pagkakapitan, apan naghambin siya og hilom nga pagdumot sa tanang lumolupyo sa sityo Himaya. Gipaguba ni Kapitan Erning ang tulay, sa katarongan nga ayohon ug bag-ohon kini. Apan wala na gayod ibalik sa pagpatukod sa bag-ong kapitan, bisan kun hitsas na unta ang tanang materyales niini.

"Tug-anan nako si Papa Erning sa atong plano! Hangyoon nako siya nga ibalik pagpabarog ang tulay, Mel...!"

"Pasabton ko usab si Papa Gundo, Gel! Patabangon nako ang tanang lumolupyo sa sityo sa pagtukod og balik sa tulay, alang sa kalamboan sa sityo ug sa tibuok baryo...!"

Pagkaugma, mao pa gani pagsidlak sa bidlisiw sa Adlaw sa silingan, maoy nabati sa tibuok baryo ang singgit ug suliyaw sa nagkahiusang mga lumolupyo sa baryo Paraiso ug sityo Himaya nga linga sa gimbuhaton aron sa pagtukod og balik sa tulay. May nagyayong og mga haligion ug tabla. May naggabas. May nagmartilyo. May nagmasa og semento. May nagkalot sa yuta. Unya, milanog ang madasigong singgit ni Kapitan Erning nga maoy nangulo sa mga trabahador sa baryo.

"Alang sa kabulahanan sa tanan, tukoron og balik ang tulay! Panaghiusa ang atong gikinahanglan...!"

Mitubag sab sa pagsinggit si Noy Gundo nga maoy nangunay sa pagpangulo sa mga trabahador sa sityo Himaya.

"Mabuhi si Kapitan Erning! Ang tulay mao ang simbolo sa atong panaghiusa ug pagtinabangay karon, alang sa kalamboan sa tibuok baryohanon...!"

Sa unahan, sa tampi sa sapa, nagginaksanay usab sila si Mel ug Angel sa tumang kalipay, kay nahatagan gayud og katumanan ang ilang paninguha nga magkauli ang maayong kabubut-on sa tagsatagsa nila ka amahan. (Kataposan)