Ang alamag ni Armando

Sila si Mando ug Eric pulos mga molupyo sa Barangay Lawis. Ang ilang gipangabuhian mao ang pagpaninda og mga sud-an sama sa pansit, tinolang isda, utan, monggos, linat-ang baboy, piniritong isda, ug uban pa.

Daghan ang mga namuyo sa Barangay Lawis. Hinuon, dili gyud tanan nila lumad gayud sa maong lugar. Aduna usay mga nilalin lang dinhi.Kada adlaw gayud ang pagpaninda nila ni Mando ug Eric. Ang mga tindahan nila dili kaayo dug-ol. May mga singkuwenta metros ang gilay-on nila. Ang maong mga tindahan nahimutang sa daplin sa karsada nga maoy agianan sa pasaheroan nga mga salakyanan ug sa mga pribado nga mga motorsiklo ug kotse.

Sanglit nahimutang ang mga tindahan sa samang balangay, nasayod sila si Mando ug Eric sa lakaw sa ilang negosyo.

Ug sa dihang nasayod si Eric nga mas daghan ang mga namalit sa mga gibaligya ni Mando, naglagot ang nahauna niini.

Sa samang higayon, nagduda si Eric nga gidaot siya ni Mando aron dili na mamalit ang mga tawo kaniya.

Sa laing bahin, nakamatikod si Mando sa pagkausab sa tinagdan ni Eric kaniya. Busa, gipakigkitaan dayon ni Mando si Eric aron patin-awan niya kini.

"Eric, nasayod ko nga daw nahimangod ka nako tali sa atong pagpaninda," matud ni Mando sa kalma nga paningog.

Wala motingog si Eric.

"Abi nimo, Bay Eric, wala gayud ako modaot nimo ... sayod ang Diyos niini."

"Aw ... kining ... Man, nahibulong man god ko nga pareho man unta tag gipaninda, pero gamay ra man ang akong halin. Ngano kaha?" matud ni Eric.

"Ah, diay ... karon dayon akong isulti ang tubag sa nakapalibog ug nakapahasol nimo. Paminaw pag-ayo: Akong gitamdan kanunay ang gitudlo kanako sa akong ig-agaw nga usa ka star salesman.

"Unsa man?" puno sa kaikag si Eric.

"Mao kining mosunod: Una, pakigsulti sa mga tawo; ikaduha, pahiyom sa mga tawo; ikatulo, ayaw pagpakig-argumento sa mga tawo; ikaupat, tagda gilayon ang mga pumapalit; ikalima, taronga paghikay ang imong ibaligya (dili pinadagan) -- dili maninagad sa presyo basta makontento ang kustomer; og ikaunom, ang kalinis sa imong mga gamit sa imong tindahan ug sa imong kaugalingon. Kun imo lang tamdan kining naasoy'ng mga tips, sigurado gyud nga mo-click ang imong negosyo!" (Kataposan)