‘Incubus’

"U-unsa man nang nature spirit, Brod?" Gipangutana ko si Brother Doi Litosa.

"Usa kana ka matang sa evil spirit nga nia sa atong palibot," mipasabot ang geomancer. "Posibleng anaa siya sa balay nga inyong gipuy-an."

Sa gisulti ni Brother Doi Litosa, nahinumdom ko sa tagulilong nga nadiskobrehan ni Ingko Honorio kaniadto nga mipuyo sa among balay. Gisuginlan ko ang geomancer mahitungod niadtong maong hitabo.

"May history diay ang inyong balay  bahin sa mga nature spirit," nagkanayon si Brother Doi Litosa human nako suginli sa tanan. "Posible nga ang maong linalang mibalik pagpuyo sa inyong balay. Hinuon, mahimong laing espiritu na usab ang nagdaot kanimo, Mrs. Salcano, kay lain na man usab ang paagi sa pagpanghasi ang imong nasinati karon."

"Unsa may angay namong buhaton, Brod?" Si Dirk ang nangutana.

"Kinahanglang matan-aw nako ang inyong balay, Mr. Salcano," sa geomancer pa.

Gikuyog namo ang geomancer ngadto sa among gipuy-an sa bukirang bahin sa dakbayan sa Sugbu. Sa among pag-abot, gisuhid dayon niya ang palibot. Gisunod niyag suhid ang sulod sa balay. Gitan-aw niya ang mga lawak.

Ang gisuhid gyod niyag maayo mao ang bedroom. Gipasabot mi ni Brother Doi Litosa nga ang lawak-katulganan usa ka pivotal point sa energy grid sa balay. Mao kini ang bahin sa balay diin ang kasagaran sa mga lantugi mahusay, mahisgotan ang mga plano alang sa kaugmaon ug ang relasyon mapahugtan sa physical act of love.

"Labing maayo nga magbutang kamog convex mirror sa pultahan ning inyong balay," matud sa geomancer human niya masuhid ang tibuok balay. "Labing maayo sab nga magbutang mog parterre."

Gituman namo ang gisulti ni Brother Doi Litosa. Among gipanid-an kun unsay resulta. Morag misalir kini. Wala na mangatol ang akong genitals. Apan paglabay sa usa ka semana, miatake na usab ang pagpangatol sa akong sexual organ. (Sumpayan pa)