“Incubus”

Gula  91

Makapasalimuang ang kakatol nga akong gibati. Makapangimbig ug makapalimbawot sa balhibo. Makapakurog sa unod. Gisubli-sublian nako’g hugas sa feminine wash ang akong sexual organ. Tungang gabii na dihang mihuwas ang kakatol niini.

Sukad niadto, bation ko na ang kahadlok ug kabalaka matag abot sa kagabhion. Nag-expect ko nga moatake gayod ang kakatol sa akong genitals matag gabii. Ang tambal nga akong gigamit igo lang mohatag og makadiyot nga relief nako. Wala gayod kini makaalim sa hingpit sa pagpangatol sa akong sexual organ.

Usa ka higayon  niana, nakabasa ko sa usa ka pamantalaan nga adunay usa ka geomancer  nga nagbase sa dakbayan sa Sugbu, si Brother Doi Litosa. Gi-feature siya sa pamantalaan gumikan sa pagkabaniog sa iyang abilidad. Sumala sa artikulo, daghan na ang masakiton nga nangaayo ubos sa iyang paagi sa pagpanambal.

Paghiuli sa balay, akong gisuginlan si Dirk bahin sa geomancer. Gipabasa ko kaniya ang pamantalaan diin special feature si Brother Doi Litosa.

“Maayo tingaling magpahiling ko kaniya, Sweetheart,” nako pa.

“Ikaw ang mag-igo,” nagkanayon si Dirk.

“Mamasin lang ta, Clairvoyant man sab kuno ang maong  geomancer.”

Tuod man, nakigkita gayod kami sa geomancer nga si Brother Doi Litosa. Ang iyang adres nga gibutang sa kataposang bahin sa artikulo sa pamantalaan maoy among gisubay pagdumdom sa iyang gipuy-an. Wala kami maglisod pagtultol sa iyang pinuy-anan kay daghan ang nakaila kaniya sa ilang dapit.

Human makapaila sa among kaugalingon, gipadayag dayon namo ang among tuyo kaniya. Gihiling ko sa geomancer. Iya kong gihimulsohan. May gipakumkom sab siya nako nga usa ka lingin nga butang nga mora og diyolin.

“Gihilabtan ka man sa usa ka nature spirit, Mrs. Salcano,” nagkanayon si Brother Doi Litosa nga mitutok pag-ayo nako.

Nakugang ko sa iyang gisulti. -- Sumpayan pa