Gula 86
Namalik na lang mi ngadto sa siyudad human makahatag og pahasubo ug gamay’ng hinabang ngadto sa mga apo ni Ingko Honorio. Bisan dili nako kadugo ang tigulang albularyo nga namatay apan mibati ko’g kawili kaniya. Dako man god og natabang nako ang maong tambalan. Siya’y dali nakong kaduolan sa higayon nga makasugat ko’g suliran nga dili masulbad sa normal nga abilidad sa tawo.
“Unsa may atong buhaton karon nga patay na man diay si Ingko Honorio?” Gipangutana ko ni Dirk samtang nagdagan ang owner-type jeep nga iyang gimaneho.
“Wa pa koy ideya, Sweetheart,” laktod kong tubag. “Naghunahuna pa ko’g unsay angay tang buhaton karon nga patay na ang tambalan.”
“Wa kaha niya ibilin sa usa sa iyang mga anak o apo ang iyang abilidad sa pagpanambal? Nakadungog man kog estorya nga kun mamatay na ang usa ka albularyo, duna gyud kuno siya’y binlan sa iyang kalaki.”
“Ambot lang. Sa akong nasayran, mora’g way anak o apo si Ingko Honorio nga interesadong manunod sa iyang kalaki tungod sa kadaghan sa mga tulomanon niini.”
Nanglabay ang mga adlaw. Nagpadayon kong nag-antos sa kakatol sa akong sexual organ nga mosugmat panahon sa kagabhion. Dili gyud mawagtang sa bisan unsang tambal. Hasta sa kapila na ko magbalikbalik ngadto sa klinika sa higala kong OB-GYNE apan wala gayod mopakita’g alibyo ang iyang pagtambal nako.
Sa hilom mibati na ko’g kabalaka sa akong kahimtang. Nangasamad na ang akong genitals sa pagsige nako’g kawot. Dili man god nako maantos ang kakatol sa higayon nga mosugmat na kini. Ang nakapait kay mosamot ang kakatol kun ako nang kawoton. Maong manghugas na sab kog feminine wash.
Lainlain nang matang sa feminine wash ang akong gigamit. Apan wala gayoy alibyo. Molurang lang sa makadiyot ang kakatol human nako’g apply og feminine wash. Paglabay sa pipila ka gutlo, mobalik na sab sa pagpangatol ang akong genitals. Hasol gayod kaayo. -- Sumpayan pa