Nagkuptanay sa ilang kamot si Tita ug Wana nga miduol sa kotseng abuhon ug uspag nga nag-parking sa kilid sa may simbahan. Domingo alas kuwatro ang takna sa kahaponon bag-o pang nahuman ang misang Binisaya ni Padre Mariano. Ang duha ka bata pa og pangisip nga nagpangidaron palang og sayes anyos, dili sila ganahang moduol sa mga nindot ug sinaw'ng mga sakyanan.
Bag-o pa lang misakay si Padre Mariano sa iyang kotse ug nangabli sa bentana kay daot na ang aircon niini.
"Sir mangayo unta mig para ipalit og pan," matud pa ni Tita, dihang nahalingi si Padre Mariano kanila.
Nahasiga ang iyang mga mata ug mikunot ang iyang agtang ug miping-it, kakulba ang gibati sa duha ka bata apan gihulat lang gyud nila kun unsay ikasulti sa pari, bahalag kasab-an total anad naman silag kasaba.
Kababata sila si Tita ug Wana wala sila masayod nga si Padre Mariano ang sakay sa maong kotse kay bag-ohay paman kini nga na asayin diha sa maong simbahan.
Di naman gyud nindot tan-awon ang kotse bisan unsaon pa og hugas abuhon ang bulok apan kupas na kini.
"Di na lang ta moduol anang kotse Tit uy!" ni Wana pa dihang layo pa sila."
"Di man siguro na mohatag kay galisud man gani pagbag-o sa pental ang tag-iya ana."
"Suwayan lang nato. Wa may kumo sa pagsuway ug mao na man sad na ang may tawo ug nangabli pa gyud."
Unya nagluksolukso sila sa paglakaw morag nagduwa og biko-bilo.
Nagbutok-butok gihapon ang ilang dughan samtang nagsud-ong sa drayber nga si Padre Mariano, gisubo lang gyud nila ang ilang panagway ug minghoy ang ilang mga nawong aron kaluy-an sila sa drayber nga wala sila masayod nga si Padre Mariano ba diay kadto."
Uy! kagwapa gud ninyong nagpakilimos dilikado og dagiton mo sa mga hakog og unod!' Mikomentaryo ang pari.
"Sige na Sir," ni Wana pa nga nagpakiluoy og panaygon ang tunado sa iyang tingog."
"Nakasabot ba mo kun unsa ug kinsa nang mga hakog og unod," ni Padre Mariano pa nga miduko aron pagtan-aw sa kambiyuhan ug may giutingkay sa iyang kiliran nga naglingi-lingi daw may gipasiplatan.
"Wala lagi mi kasabot ana Sir," ni Tita pa.
"Unsa man diay na Sir?" ni Wana nga miindak sa iyang tiil.
"Kanang manglulugos og mga batan-on!" ni Padre Mariano pa nga mipahiyom.
"Uy! simbako tawon! palayo! nagdungan og litok ang duha ka bata, motalikod na unta sila kay abig di mohatag ang tawo nga si Padre Mariano."
O, dali! kun dili pa mo guwapa ug maanyag nga nagpakilimos dili ta ko mohatag ninyo" matud pa ni Padre Mariano nga milingi sa tuo kay ang iyang kuyog nga babaye namalit pag-prutas. Gibukhad nilang Tita ug Wana ang ilang tuong palad ug gitaga-an silag tag-diyes pesos ni Padre Mariano. Nalipay kaayo sila.
"Salamat Sir," gikan nilang Tita ug Wana.
Dayon nag-iktin-iktin silang mipalayo sa kotseng abuhon ug nagpanakla si Padre Mariano nga nagtan-aw sa mga batan-on samtang naghulat sa iyang kauban nga babaye. (Kataposan)