‘Incubus’

(Gula 80)

Bisan nag-ilis na ko’g SIM sa akong cellphone apan nangita gayod og paagi si Bradley nga magka-communicate kami. Nanawag gyud siya sa landline sa hospital nga akong gialagaram. Kun magkanunay kini, tingalig dunay magduda namo. Wala koy problema kang Cynthia kay nasayod man siyang managhigala sila si Dirk ug Bradley. Ang akong gikabalak-an mao ang uban namong kauban nga mga doktor.

Gitawagan namo ang company operator. Pagtubag niini sa akong tawag sa telepono, gihatagan ko siya’g instruction. Giingnan ko siya nga kun may manawag nga usa ka Bradley Bagutsay ug akoy tuyo, pasultihan kini nga wala ko sa hospital kay may gilakaw. Mitando ang company operator. Tuod man, wala na koy nadawat nga tawag gikan kang Bradley hangtod nga mi-off ko sa trabaho sa pagkahapon.

Sa among pagpauli sa balay, wala koy tingogtingog. Si Dirk nagmatingad-on. Iya kong gipangutana kun unsay nahitabo nako.

“Gikapoy lang tingali ko sa trabaho, Sweetheart,” gibakakan ko si Dirk. “Daghan man god mig giatiman nga mga pasyente karong adlawa.”

“Mao ba?” Sukna ni Dirk.

“Mao kana. Pero wa ni kaso. Mawagtang ra ni kun makapahuway na.”

“Ako na lay maghikay sa atong panihapon aron ka makapahuway.”

“Mas maayo pa tuod.”

Si Dirk gyud ang naghikay sa among panihapon. Maayong moluto si Dirk. Hilig na niya ang pagpangluto sukad sa ulitawo pa siya. Karon napahimuslan niya ang maong hilig. Siya’y mibanos nako sa mga bulohaton sa kosina.

Wala dangtig usa ka oras, nahibalik si Dirk sa among kuwarto ug nagpahibalo nga manihapon na. Nagkuyog mi ngadto sa komedor ug nangaon. Pagkahuman, mibalik dayon ko sa kuwarto. Si Dirk nay nanghipos sa among  mga kinan-an.

Dihang mihigda na ko sa kama, nabatyagan ko nga mikatol ang akong sexual organ. Labihan gyung katola! – Sumpayan pa