‘Incubus’

Wala ko mahimutang samtang naghigda tungod sa kakatol sa akong sexual organ nga daw dili na nako maantos. Dili masabot ang kakatol. Morag gitil-asan ang tibuok palibot sa bukana sa akong pagka babaye.

Mibangon ko og mibalik sa banyo. Gihugasan nakog feminine wash ang akong sexual organ. Giayo gyod nakog limpiyo. Gisabonan ko kini sa makadaghan. Unya nag-apply na sab kog feminine wash aron pagseguro nga mawagtang na ang kakatol niini.

Human makapanghugas, mibalik ko sa kama ug mihigda. Nahinanok pa gihapon si Dirk. Gusto na sab kong mahikatulog pagbalik kay pasado alas dos pa lang ang takna sa kaadlawon. Apan wala na ko makatulog. Nagpadayon ang pagkatol sa akong pagka babaye. Wala mawagtang ang kakatol sa feminine wash nga akong gi-apply.

Lami gyod kaayong kawoton ang kakatol sa akong genitals. Makabuang ang iyang kakatol. Apan nag-amping kong dili makusog ang akong pagkawot kay tingalig masamad o magasgas ang akong sexual organ. Nagpamahit ko sa akong wait samtang nagpalamilami ko pagkawot sa nangatol kong pagka babaye.

Dihang daw dili na sab nako maantos ang kakatol, mibangon na sab ko ug mibalik pagsulod sa banyo. Gihugasan nako pag-usab ang akong sexual organ. Giaplayan ko kini pag-usab og feminine wash. Gisabonan sa makadaghan.

Pagbalik nakog higda sa kama, nahigmata si Dirk.

"Unsa bay nahitabo nimo nga mora ka man og naghiwasa?" nangutana  siya.

Gitug-anan ko siya sa hinungdan. Nakugang siya human nako sultihi nga katol kaayo ang akong genitals. Naghigwaos ko tungod sa kakatol.

"Naunsa man diay na?" Sukit ni Dirk.

"Ambot lang," nako pa. "Mikalit man lang ni kaganina human nakog pangihi."

"Tingalig dunay bacteria?"

"Gihugasan ko na bitaw nig feminine wash. Katol man lang gihapon."

Nahingawa si Dirk sa akong kahimtang. (Sumpayan pa)