Ganahan og pangayam si Ronan sa ilang kaingin nga gitikad sa iyang Papa Rowet nga kabilin sa ilang apohan nga nipanaw na sa lain kalibutan. Kining dapita sa among balangay may gidungog nga iro sa dili ingon nato kay mapakita man og ting-ulan-ulan ug manghasi sa among dapit morag irong buang ug mokalit lang kawala sa kalibunan.
Tukoy Dagiling, si Ronan nga gatawag sa iyang binuhi nga iro para mangayam aron makakuha ug tikling kay hapon naman og tinggawas na sa tikling, bagwak nga mangakha og pagkaon sa ngilit nga sapa sa among kaingin nga gitikad ni Papa Rowet ug gipatamnan og nagkadaiyang saging, gabi, kalabasa, mais, kalamunggay nga sagol-sagol lang utanon sa palibot ang among gipananom.
Mao daghan ang mga mananap nga mamingwet sa bunga. “Hala unsa man kahay nakit-an sa akong iro sa kumpayan og naper nga nisuot man gyud na ang akong iro nga labong man kaayo ang naperahan nga gikumpay sa among kabaw laki .... oi hala nangangha ko sa dihang akong iro gikitiw-kitiw ang iyang ikog ug naghupo sa naperahan ... "awwww .... awwww .... awww paghut sa akong iro nga si
Dagiling.
Mao diay nakasigpo kay diha ra sa iyang salaag ang tikling ug nakuha gyud kini ug akoa dayon kining gikuha sa tiilan sa akong iro nga gitapin-an sa duha niya ka pangonahan tiil. "Maayo gyud ang imong gibuhat Dagiling." Nakig-estorya ko sa akong iro nga ginganlan ni Papa Dagiling ang angga kay buotan ug hapsay kaayo ang balahibo kung asa ko padulong mokuyog pud si Papa kung magabhian og pauli sa balay kay nakakitag tangka sa bahal sa ilang Pedro magsupinday na sa pag-uli ug ang iro mao nay mogayad sa dalan pauli. Kanang akong estoryahan ang iro morag makasabot kay mo aww, awww pud kini. Akoa dayon gihimolbulan ug gisugba sa baga nga kayo uling ug gaandam kog suka, sili kolikut nga timplado sa patis asin bitsin nga iparis sa bahaw nga mais nga pinagaling sa bato ug tinurakan sa kamote nga haut kaayo.
Sos, nagtabisay gud ang akong iro nga nagpaabot nako og itsahan og bukog sa tikling ... pagkasunod adlaw kadtong sikbit sa among balangay nahiagi sa among dapit ug maayong pagkatayming nga nibunok ang ulan ug maayong pagkahumod sa dalaga nga ang iyang bisti malobagan gyud kini sa kabasa ... awwww ... awwww ... awww nahibulong ko nga kalit lang og paghut ang akong iro ug nagtabisay ang laway nga nagsud-ong sa duha ka bungtod sa Kantoratoy nga nahulma ... nagkatawa kong gasud-ong sa akong iro nga morag irong buang nga ang dagway kay nagtalagak ang laway. (Kataposan)