“Incubus”

Gula  63

Ang kabugnaw sa aircon sulod sa lawak nga among nahimutangan ingon sa wala makapugong sa pagpanginit ni Dirk. Kadali ra sab kong natakdan sa iyang kainit maong gisaw-an namo pagtagay ang dugos sa lawasnong kalipay.

Nahikatulog mig balik human sa among pagpinarayganay. Lapas na sa alas siyete sa buntag kaming nakamata. Nagdali-dali ko’g pahigayon sa akong morning rituals.

“Dili una ta manuroy ron, Sweetheart,” giingnan ko si Dirk samtang namahaw mi sulod sa among lawak sa hotel. “Mopahuway una ta.”

Nagpa-room service lang mi kay wala ko layhing  mogawas sa hotel.

“Ikaw ang mag-igo, Ingrid, Sweetheart,” paundayon ni Dirk.

Tibuok adlaw ming nagmuok sulod sa among hotel room. We spent the whole day watching TV and making love. Magpahatod lang mi’g pagkaon sa mga crew sa hotel kun gutomon na kami. Gitilok namo ang mga gutlo pagtagay sa lawasnong kalipay hangtod sa pagkagabii. Gitagbaw namo’g maayo ang among kaugalingon.

“Siyaro’g di ka pa gihapon momabdos,” ni Dirk pa human sa makutas namong pagtagay sa lawasnong kalipay.

“Kausa ra buhata ang bata, Sweetheart,” giingnan ko siya. “Ang kadaghan sa mating o copulation dili kabasehan sa pagmabdos.”

“Bisan na. Mas maayo gyud kun kadaghanon. Sama god sa raffle promo. Kun mas daghan ka’g entries, mas dako ka’g tsansa nga modaog.”

“Buing...”

Pagkasunod adlaw, nanuroy na sab mi. Among giduaw ang lainlaing maanindot nga dapit sulod ug gawas sa siyudad sa Naga. Gabii na ming mipauli sa Lucky Fortune Hotel. Nanihapon ming daan sa gawas sa wala pa mi molahos sa hotel.

Paghisulod namo sa among hotel room, mibagting ang incoming call alert sa akong cellphone. Ako dayon kining gisusi. Wala marehistro sa phonebook sa akong cellphone ang mga numerong mi-reflect sa screen. -- Sumpayan pa