Duha ka alimukon

Igo gayud nga nabugkos ni Henry ang patay'ng kahoy nga igsusugnod, dihang nalantawan niya ang duha ka alimukon nga mitugdon sa sanga sa kahoy'ng bayong. Mingislit ang iyang pahiyom. Tayming sab kaayo nga nadala niya ang goma niyang tirador. Tiradoron niya ang duha ka alimukon nga paraygon kaayong nagtinusikay ibabaw sa sanga sa bayong.

"Dong Henry! Pangahoy og kahoy'ng igsusugnod! Dayon, paglung-ag og kan-on! Manguha ko'g utanon sa atong banika alang sa panihapon!" mao kini ang tugon kaniya sa iyang Mama Mayling nga nagdala og basket kaganiha. "Ayaw bayag ligoyligoy, ha! Tumana dayon ang akong sugo!"

Igo lang nga gitando ni Henry ang tugon kaniya sa kugihan niyang inahan. Sa edad nga 11 anyos nga mitungtong na sa kinto grado sa elementarya, siya ang kaabag sa iyang Mama Mayling sa tanang buluhaton sa balay ug sa ilang uma sa banika. Nabiyuda ang iyang inahan dihang natagak sa sanggotan ang iyang Papa Binog. Sanglit 30 anyos pa ug porma pa kaayo ang bigot nga lawas, namatikdan ni Henry nga daghang kaulitawhan nga katalirongan sa iyang inahan, ang naninguha nga makaangkon sa ikaduhang gugma niini. Anaa sila si Noy Ronie, Noy Jimmy, Noy Roger, Noy Nato ug Noy Marman. Apan igo lang nga mopahiyom ang iyang inahan dihang dasigon kini niya sa pagminyo pag-usab.

"Sus, kanimo, Dong Henry! Di nako pulihan sa akong dughan ang namatay na nimong Papa Binog, uy....!"

"Ay, sus, si Mama baya! Padilidili pa, bisan morag kaminyoon na!" pasiaw ni Henry sa iyang inahan. Namatikdan man gud sab niya nga kanunay nang manghindik ang iyang Mama Mayling matag lakaw  niini.

Mainampingon nga mikamang si Henry paingon sa dakong punoan sa bayong. Mahinamon siyang nagpatungod sa sanga nga gitugdonan sa duha ka alimukon nga padayong nagtinusikay sa usag-usa. Kalma niyang giinat ang iyang tirador nga nag-ugom na ang panit sa linging bato nga bala. Tumong niya nga ig-on gyod ang duha ka alimukon sa usa ka bala lamang.

Apan kalit lang nga may paspas nga kinasikas sa luyong bahin sa dakong punoan sa bayong. Abtik nga milupad ang duha ka alimukon nga wala pa matirador ni Henry. Nakapanakla sa kahinugon si Henry. Nakapanglingo siya. Mainampingon ug mihinay paglili si Henry sa luyong bahin sa dakong punoan sa bayong nga maoy gigikanan sa paspas nga kinasikas nga daw kabaw nga nagdayak.

Nahasiga ang mga mata ni Henry. Bida, maoy nasugat sa iyang panan-aw ang hubong lawas sa duha ka binuhat nga nagromansahay -- si Noy Marman ug ang iyang Mama Mayling! (Kataposan)