Kublan nga namatay kay gidunlan

Daghan ang nagtuo nga kini si Pikto, may katingalahang lana sa bitin, nga gikan nagluno nga iyang ipamanyos sa iyang kalawasan, nga dili man gayod dutlan, bisan pa og rapidohon sa bala sa Armalite.

"Anhi nila makita Posing, unsa kining talagsaon kong anting-anting nga nahuptan! sagol pasiatab ang tuno sa sinultihan ni Pikto, ngadto sa iyang asawa.

"Tan-awa unsay nahitabo sa dihang gisulong kita sa mga rebelde nga gikan sa bukiran sa Kampawog, nahurot na lang ang ilang bala ug mitapsing lang gihapon sa akong kalawasan nga wa gayod ako dutli!"

Igo lamang gitutokan ni Posing, nga dihay sambog nga katingala nga nagsud-ong sa kalawasan sa iyang bana nga bisan garos na lang wa gayoy tatsa?

Hapon kadto sa adlaw'ng Sabado. Ngitngit na nga nagpalunang sa iyang kabaw si Pikto. Gumikan sa kadako pa sa iyang darohon, nalimot na lang siya pagpaniudto sa iyang bawon. Wa mag-usik og lain pang panahon si Pikto, diin sa iyang pag-abot sa balay iya kining gikaon, sa tumang kagutom.

"Possingggggg ... tagaiiii ... akooo .... og tubig ... kay ... lugossss ... akooo ... makaginhawa!" siyagit sa pakitabang ang nasawod sa dunggan ni Posing, gikan sa iyang bana nga sa iyang tan-aw mianam na sa pagtuay.

Mao na lamang ang nabatyagan ni Posing, nga nadunlan diay intawon ang iyang bana, sa tibuok nga kan-on nga migahi na daw bato sa kabahaw!

Gisuwayan sa paghilot sa asawa ang tutonlan ni Pikto, apan wa na siya’y mahimo, kay wa na man kini moginhawa. Nagkagubot ang mga silingan sa nahitabo ni anhing Pikto, kun ngano nga wa mosalir ang iyang pagpakublan, nga unta dili man dutlan sa bala sa Armalite nga mamatay lang kun dunlan?

Way hunong sa pagminatay si Posing, sa gidangatan sa namatay niyang bana ug didto pa masuta sa kadugayan nga ang kalawasan diay ni anhing Pikto, gihapinan og stainless nga pinatuyo niya og         pahimo.

Daghan ang nakapanakla ug nakapanglingo-lingo, nga gumikan sa talagsaong diskarte sa pagpangilad ni anhing Pikto, nga dili siya dutlan kay kublan ... nahibaw-an ra gihapon sa kadugayan. Nahimo kining pagtulun-an sa kinabag-an niyang  silingan nga mahibaw-an ra gihapon ang iyang tinonto sa kadugayan. (Kataposan)