Daug sa asawa

Nagkahugpong ang mga batan-ong lalaki sa Sitio Opiga. Gusto nilang maalegre og balik ilang balangay. Sukad lang nagkabangi ang managbayaw nga sila si Brando ug Charlie, nawala na ang kaalegre sa ilang lugar. Hilig man god og kanta si Brando. Way laing makaduyog og gitara. Iya rang bayaw. Di man kaabot ang videoke didto sa kabukid sa maong dapit. Di na sila magkaduol. Nagkontrahay. Gustong paulion ang maayong kabubut-on sa mga higala. Maong nakaidiya ang mga higala nga magpundok. Ilang imbitahon ang managbayaw. Duna silay plano.

Tulo ang mopogong ni Brando kun moalma. Si Tacio, Nulfo ug Wewe. Tulo say mopogong ni Charlie kun moalma. Si Gary, Em ug Poldo. Bantayan o sutaon gyud nila nga way makadalag armas. Sutaon gyud nila nga di magkadinapatay. Basta mamentenar ang kalinaw.

Si Charlie abogado. Naabogado siyas iyang paningkamot. Kay nag-working student. Iyang asawa si Agnes manghod ni Brando. Si Brando retirado nga pulis. Iyang asawa ang kahi hepe sa ilang lungsod. Pensionado na silang duha. Duna lay gamay nga wa pagsinabtanay ang managbayaw. Nagdaku. Naareglo sila sa barangay. Apan taphaw ra gihapon. Sama ra sa wa maareglo. Kay wa man gihapon silay tinagdanay kun magkita.

Si Charlie ang nisurender nga di nalang motagad. Aron way kagubot. Motagad kanunay si Charlie og una. Apan mongolob man lang si Brando. Komplemento  lang ang tinagdan. Kaniadto "Brod" gyud ilang tinawganay. Si Charlie motawag gihapon og Brod ni Brando. Apan si Brando moingon lang "O". Way lami. Busa nakahukom si Charlie nga di nalang motagad.

Domingo sa hapon. Sa payagpayag nga ilang pundokanan. Nakainom na ang duha. Nagtinotokay ug mahait nga tinan-awan.

"Unsa may gusto nimo, Attorney? Nia man gyud ta karon. Nagkaatubang!" Nguhal nag gamay si Brando.

"Ako. Mahubog kog sa dili. Ang akong gusto kanunay, kalinaw, panaghigalaay. Jamming!" ni Charlie.

Nguhal na sab og diyutay. Alerto na ang mga komittee sa kalinaw nga managhigala. Nialibwag ang mga wa masayod sa plano.

"Nasayod na ko nga kun magkinaunsa, alkanse ko nimo. Kun magkinihaay, abogado god ka. Libre kag abogado," ni Brando.

"Di man sab ko mokiha og tawo nga way gibuhat dautan," ni Charlie.

"Angay kang masayod nga wa koy gilaraw’ng dautan batok nimo!" ni Brando.

"Salamat kun mao kana. Ako mao sab. Wa koy gilaraw'ng dautan batok nimo," ni Charlie.

"Unya! Nganong naingon man ta niini?" ni Brando.

Tungod gyud sa hatudhatud nga istorya" ni Charlie.

"Mao ba? Unsaon ta man ni pagsumpo? Ang hatudhatud og istorya?" ni Brando.

''Aron way maghatudhatud, kita na ang mag-istorya" ni Charlie.

"Unsay buot nimong ipasabot?" ni Brando.

"Isulti nimo sa akong nawong direkta ang tanan nimong gustong iinsulto, isaway o ireklamo batok nako. Kay basin mapasaylo ko sa akong sala nimo. Ug mao sab akong buhaton nganha nimo," ni Charlie.

"Yati ra! Sugot ka ana?" ni Brando.

"Sugot kaayo. Kay sa adto ko nimo sawayon sa laing tawo. Insultoha ko. Sawaya ko sa akong nawong!"  ni Charlie.

"Sige! Daug kag asawa!" ni Brando.

"Labaw pa kang daug sa asawa!" ni Charlie.

"Probaha!" ni Brando.

"Akong asawa gustog kalinaw. Imong asawa gustog kagubot!" ni Charlie. Nangyango ang mga naminaw. Nidukoduko si Brando sa kahubog.

"Unsaon ko man nang akong asawa. May baroganan man siyang iya!" ni Brando.

"Disiplinaha kana imong asawa. Ipalutaw imong pagkabana," ni Charlie.

"Dako mag ranggo akong asawa. Hepe man na. Ako SPO2 lang," ni Brando.

"Sibilyan na mo karon. Kay retirado na mo. Busa, kinsay hari sa panimalay maoy masunod," ni Charlie.

"Unsa may imong gusto gyud mahitabo?" ni Brando.

"Mabalik atong kaalegre dinhi. Sama niadtong mga ulitawo pa ta. Ako nanguyab sa imong manghud, alegre ta. Ikaw ulitawo pa, alegre ta," ni Charlie.

"Kana ra diay. Shoo," ni Brando. Nitawag si Tacio. "Pagkuhag gitara. Ihatag ni brod Charlie. Kay mokanta ko!" ni Brando.

Gipasahian dayon ni Charlie og "Mabugnaw Ang Lasang" signature song ni Brando. Namakpak ang mga barkadang nagpalibot sa duha human sa kanta. Gisundan pa gyud og "Skyline Pigeon". Dayon "I Started The Joke". Hilabihan                                                      na gyung alegreha nila. (Kataposan)