"Incubus"

Gikan sa Pier 4 sa dakbayan sa Sugbu misakay mi'g fastcraft paingon sa Ormoc. Nakasakay dayon mig bus sa Ormoc nga mobiyahe paingon sa Manila. Gikan sa Tacloban, milabang mi sa yuta sa Samar agi sa San Juanico Bridge. Gabii na sa pag-abot namo sa lungsod sa Allen, Northern Samar diin gikarga og barge ang bus nga among gisakyan tabok ngadto sa Matnog, Sorsogon nga sakop sa Bicol region. Alas kuwatro sa kaadlawon nahiabot na kami sa terminal sa siyudad sa Naga, Camarines Sur.

Pagkanaog namo sa bus, nagpahatod mi'g tricycle ngadto sa Lucky Fortune Hotel, nga nahimutang sa kinapusoran sa siyudad. Nagpa-check in dayon mi sa reception desk alang sa accomodation. Pagkahuman, milahos mi sa Room 307. Pulos lapoy ang among lawas sa biyahe maong diretso mi sa kama sa among pagsulod. Naghigda na gani ko samtang  akong gitangtang ang akong sapatos. Nakatulog dayon mi.

Hapit na ang alas diyes sa buntag sa akong pagmata. Wala na si Dirk sa akong tupad. Nagsiga ang suga sulod sa banyo ug naglagasak ang tubig sa shower. Naligo diay kini. Samtang naghulat nga mahuman siya'g kaligo, gipahimuslan ko ang pag-order og pagkaon kay wala pa man mi makapamahaw. Nagpa-room service mi.

Migawas si Dirk sa banyo nga presko kaayo kay bag-ong kaligo. Gisul-ob niya ang limpiyong mga sapot nga akong giandam. Wala madugay nahiabot ang naghatod sa gi-order namong pagkaon. Nangaon dayon mi kay mihilab na ang akong tiyan sa kagutom.

"Asa man ta ron human og pangaon?" Gipanguta ko ni Dirk.

"Manuroy," matud ko. "Bisan asa."

"Wa ka na diay kapuya sa taas natong biyahe?"

"Nakapahuway na ko. Nawagtang na ang kalapoy sa akong lawas."

Human makakaon sa nalangan nga pamahaw, misulod ko sa bayo ug naligo. Paggawas nako sa banyo, ready na ko alang sa panuroy namo ni Dirk. Pero morag nausab man ang hunahuna ni Dirk dihang nasingo niya ang akong kahumot nga bag-ong kaligo. Ang kinidlap sa iyang mga mata nagpakitag timailhan nga gusto niyang makig-make love nako. (Sumpayan pa)