(Gula 41)
Nagkatinan-away mi si Dirk sa among nadungog gikan kang Papa Gustavo. Morag pareho mig gihunahuna. Sa akong pagsabot, ingon sa naghinamhinam ang akong mga ginikanan nga makakita sa liwat namo ni Dirk. Pulos na retirado ang akong parents.
“Mga tiguwang na baya mi, Ingrid,” matud ni Mama Dortha. “Mosugot man tag dili, talisawop na ang among adlaw. Maayo unta nga makakita na mi sa among apo gikan kaninyo sa dili pa bawion sa Kahitas-an ang among mga kinabuhi.”
“Ayaw una mog hisgot bahin sa kamatayon, Ma, uy,” gibadlong ko ang akong inahan aron dili mosangko sa kasubo ang tema sa among panagsulti. “Ug ayaw mo kabalaka. Maningkamot lagi mi si Dirk nga makatibuok dayon.”
Unya mitipas sa laing tema ang among panagsulti. Gisuginlan ko sila mahitungod sa mga panghitabo sulod sa among balay sa unang mga gabii human sa among kasal. Ako silang gitug-anan nga mikonsulta mi sa albularyo nga si Ingko Honorio ug nasayran nga usa ka tagulilong ang nanghasi namo ug gihinginlan na kini sa tambalan.
“Nganong wa man mo motug-an dayon namo nga nagubot diay mo sa inyong gipuy-an?” Gikan ni Papa Gustavo.
“Wa na lang mo namo pahibaw-a aron di mo mahasol,” gipasabot ko sila. “May sakit sa kasingkasing ra ba si Mama. Anyway, nasulbad na man ang problema. Misalir ang gihimo ni Ingko Honorio kay wa na man gyud mi togawa sa tagulilong.”
“Epektibo kaayo ang kalaki ni Ingko Honorio,” matud ni Papa. “Bata pa ko, siya nay dangpanan sa akong mga ginikanan kun duna sila’y problema nga may kalambigitan sa nonphysical forces.”
“Gibugalbugalan ug gisaway baya mi sa among mga higala kay motuo kuno mig folklore,” matud ko nga didto motan-aw sa nagpakahilom kong bana.
“Sagdi lang sila,” matud sa akong amahan. “Managlahi man og baroganan ug pagtuo ang tawo. Dili ta sila mapugos nga dunay mga panghitabo dinhi sa kalibotan nga dili ikapasabot sa natural law. Pero bulahan ta nga mituo niini.” – Sumpayan pa