Wa matulog ang DiYos

Usa ka bulan na kapin nga nangita’g trabaho si Maricar sa siyudad. Dakong masakiton ang iyang inahan. Nagkinahanglan og tambal. Siya ang kamagulangan sa tulo ka magsoon. Igo lang  siyang nakahuman sa hayiskol kay ang iyang amahan mibiya man kanila. Nakigtaban og laing babaye.

Bisan unsa lang ang gitrabaho  sa iyang Mama Carmela aron lang sila mabuhi. Nanawat og labada. Mangangkat og mga utanon sa Carbon o kaha isda ba, unya ilibod niini sa ilang dapit. Hangtod nga nasakit kini.

Nag-eskuyla pa sa elementarya ang duha niya ka manghod. Sa publikong tulunghaan nuon, way bayad ug malakaw lang gikan sa ilang gipuy-an. Ug siya naningkamot nga makakita gyod og trabaho.

"Paita ani, Ma, uy! Wa man gyod ko kakitag trabaho." Nanghupaw si Maricar pag-abot niya sa ila usa ka hapon niana. Naminghoy siya nga mipauli kay gibalibaran siya sa nanagdumala sa mga pabrika ug tindahan nga iyang giaplayan. Wa kunoy bakante.

"Sagdi lang, Day Maricar, kay kun maayo na ko, ako lang gihapon ang mangitag kabuhian."

Hapit makahilak si Maricar sa gisulti sa iyang inahan. Naluoy kaayo siya niini. Kun nasayod pa lang siya kun hain na ang iyang amahan karon, mangayo gyod unta siya’g tabang niini. Apan wa siya’y kasayoran kun hain na magpuyo ang iyang amahan karon uban sa gitaban niining babaye.

"Pahuway lang gyod una. Ma. Ugma, basig makakita na ko’g kasudlan. Bisag gamay suweldo basta tinarong lang." Gialam-alaman niya ang iyang inahan. Di siya gusto nga maguol kini kay basig mabughat kini. Gihilantan man god ang iyang inahan. Taas nga hilanat nga ubanan  og gahing ubo.

Igo lang mikaon og lasaw nga linugaw si Maricar nianang pagka buntag. Naglakaw lang siya paingon sa siyudad. Para plite na lang sa iyang pagpauli ang nahabilin niyang kuwarta. Kun duna siya’y maagian nga pabrika ug tindahan nga dako, moaplay siya. Ug sama sa gihapon, way bakante.

Nagkainit na ang adlaw. Gipaningot na si Maricar sa pagpangitag trabaho. Hapit na siya kawad-ig paglaom. Gusto na siyang mosulod og daotang trabaho.

"Ayaw pag-antos, uy, Mar. Lisod kaayo ang pagpangitag trabaho sa sama natong way nahumang kurso. Kuyog na lang nako. Mokita ka pag dakong kuwarta. Pabaga lang sa nawong ang puhonan."

Nahinumdom si Maricar sa gisulti ni Shiela nga iyang silingan nga nagtrabaho sa usa ka nayt klab. Apan iya kining gibalibaran. Daotan ang trabaho niini. Nagbaligya sa dungog. Apan karon morag gusto na siyang mouban kang Shiela.

Kalit nga nalipong si Maricar. Mituyok ang iyang panan-aw. Hangtod nga nawad-an siya sa panimuot.

Nabalikan siya sa maayong panimuot sa sulod sa lawak sa ospital. Maoy una niyang nakita ang gulangon nga babaye nga nagbarog sa iyang atubangan.

"Maayo kay naulian ka na, Day. Nabangalan ka nako sa daplin sa karsada nga nasarasay dayong katumba. Gidali ka nakog dala dinhi sa ospital."

Nakahilak si Maricar nga nahinumdom sa iyang gidangatan. Unya nagpasalamat siya sa babaye nga nagluwas kaniya.

"Nganong naingon ka man diay niadto, Day?"

"Tungod sa pagpangitag trabaho, Nang." Unya gisugid ni Maricar ang tanan.

"Mao ba. Aduna ako’y dakong Grocery store sa siyudad. Ipasulod ka nako’g trabaho. Tagaan tikag maayog suweldo aron makatabang ka sa imong inahan ug mga igsoon."

Nagakos ni Maricar ang gulangong babaye sa gibati niyang kalipay. (Kataposan)