Pagkagabii, human sa panihapon, giandam nako ang guest room aron adto matulog si Ingko Honorio. Apan mibalibad ang tigulang. Gusto niyang sa sopa sa may sala na lang siya matulog aron kuno iyang kabantayan ang tagulilong ug dili kini makatugaw namong magtiayon. Gipaundayonan ko nalang siya sa iyang gusto.
Dihang nahilom na ang palibot, gipalong ni Dirk ang suga sulod sa among lawak aron mangatulog na. Mao na lamay nagsiga ang lampshade sa ulohang bahin sa kama. Dihang mihigda na si Dirk sa akong tupad, akong gibulanit ang habol ug gibukot sa akong lawas. Unya mitalikid ko patalikod ni Dirk. Apan iya kong gigabling paatubang kaniya. Nagkatinutokay ming duha.
Inanay nga nag-abot ang among mga ngabil. Hangtod nga nagkaakob gyod kini sa mainiton nga hinagkanay. Nagtinal-opay ang among mga dila. Gibati ko ang tumang kalalim sa pagana nga gihimo ni Dirk. Wala na gani ko makamatngon kun giunsa pagtangtang ni Dirk ang mga salimbong sa akong lawas. Mao na lamay akong naamgohan nga managsama na kaming walay mga sapot dihang nagkadapat ang init namong mga lawas.
Apan sa wala pa mokuyamang sa hingpit sa tibuok kong kalawasan ang naghingapin nga sensayon, dihay kalit misantop sa akong hunahuna. Akong gitukmod si Dirk.
"Naunsa ka man?" Gikuyogan sa kahibulong ang pangutana ni Dirk.
"Ang tagulilong," nako pa. "Tingalig tugawon na sab ta niya."
"Ayaw kabalaka. Naa bitaw si Ingko Honorio sa gawas, nagbantay nato aron dili ta samokon sa tagulilong. Busa, there's nothing to worry, Sweetheart."
Wala na ko makabalibad. Nagpatara na lang ko. Mi-score gyod si Dirk. Sawsaw to the max ang drama ni Dirk. Gibati ko ang kalalim sa iyang gibuhat. Nagdungan gyod mi'g sangko sa kinapungkayan sa himaya. Mora ko'g naglutaw sa cloud nine.
Igo lang nahuman ang lovemaking session namo ni Dirk, may nadungog ming lagubo nga naggikan sa gawas sa among lawak. Didto sa may sala. Unya nadungog namo ang tingog ni Ingko Honorio. Midali pagbangon si Dirk. (Sumpayan pa)